04 апреля 2009 г.
Вăхăт малаллах шăвать, анчах кĕрхи призывпа çамрăксене ăсатрăмăр. Акă ĕнтĕ – çуркунне çитрĕ, черетлĕ призыв пуçланчĕ. Вăл апрелĕн 1-мĕшĕнчен пуçласа июлĕн 15-мĕшĕччен тăсăлĕ. Раççей Федерацийĕн Президенчĕн Указĕпе килĕшÿллĕн пурĕ çĕршыври 305 пин те 506 çамрăк çурхи призывпа çар ретне тăмалла. Чăваш Енри 2900 çамрăкăн çĕршыв умĕнчи тивĕçе пурнăçлама тивет. Етĕрне тата Хĕрлĕ Чутай районĕсенчи çар комиссариатĕнчен 170 çамрăка ăсатмалла. Сăмах май, иртнĕ призывпа 106 каччă çар ретне тăнă. Кăçалхи кăтарту малтанхи призывпа танлаштарсан самаях пысăк. Раççейĕпе илсен, асăннă цифра виçĕ хута яхăн ÿснĕ. Сăлтавĕ: малтанхи çулсенче пĕр призыври çамрăксем вăхăт çитнĕ май киле таврăннă пулсан, кăçал вара çу варриччен çар ретĕнчен тÿрех икĕ призыври çамрăксене хăтараççĕ: пĕрисем – 2007 çулхи кĕркунне кайнисем, теприсем – пĕлтĕрхи çуркуннехисем. Çапла вара, çарпа пурĕ 219 пин каччă сыв пуллашать. 305 пинрен 219 пин кăларсан чăннипе те набор 86 пин салтак чухлĕ ÿсни курăнать. Ку салтаксен пысăк пайĕ киле таврăннине саплаштарма кирлĕ.
Палăртмасăр иртме çук, çĕнĕ çул хыççăн çар комиссариачĕсенче чылай улшăну пулса иртрĕ. Районсенчи комиссариатсенче тăрăшакан çар çыннисене çар ĕçĕпе çыхăнманнисен шутне (гражданский штат) кĕртрĕç, пĕртен-пĕр офицер должноçĕ – çар комиссарĕн сыхланса юлнă.