04 апреля 2009 г.
«Хĕвел» ача сачĕн вăтам ушкăнĕнче "Театр салонĕ" тÿлевсĕр кружок ĕçлет. Унта 12 ача çÿрет. Кружокăн çулталăклăх ятарлă план та пур.
Ачасене кĕçĕн ушкăнранах илемлĕ сăмаха илтме, çавăн пекех пĕр-пĕринпе калаçма, юмахри чĕр чунсен хусканăвĕсене евĕрлеме хистекен тĕрлĕ такмаксемпе, сăвăсемпе усă курма хăнăхтарассипе ĕçлеме пуçларăмăр. Ача садĕнчи театрализациленĕ ĕç-хĕл пепкесен ăсра сăнарлассине, шухăшлавне, ăс-тăна тата тĕрлĕ енлĕ пултарулăха аталантарма май парать, кăмăл-туйăма палăртма вĕрентет. Ятарлă костюмсемпе, маскăсемпе тата декораципе усă курни вара пĕчĕк артистсене юмах тĕнчине лекме, хăйсен сăнарĕсене çывăхрах туйма, вĕсен характерĕсене кăтартма пулăшать.
Районти ача-пăча библиотекине çÿресси те йăлана кĕчĕ. Унта ачасемпе çĕнĕ юмахсемпе паллашатпăр, кĕнекесенчи илемлĕ ÿкерчĕксене сăнатпăр, сăвăсемпе калавсене вуласа тишкеретпĕр.
Ашшĕ-амăшĕсемпе тачă çыхăну тытни те пысăк пулăшу парать.
Декорацисемпе костюмсем хатĕрлес тĕлĕшпе ашшĕ-амăшĕсем аякра тăмаççĕ.
Эпир вĕсене хамăр ушкăнра иртекен каçсенче тата вăйăсенче сăнарсене выляма та час-часах явăçтаратпăр.
Акă, мартăн 31-мĕшĕнче амăшĕсем хăйсен тĕпренчĕкĕсене "Ăссăр шăши çури çинчен юмах" лартса пачĕç. Хĕр ачасемпе арçын ачасем мĕн юмах пĕтичченех тимлĕн пăхса ларчĕç. Вĕсем никам хистемесĕрех аслисен опытне ăша хыврĕç. Юмахри чĕр чунсен хусканăвĕсен характерне палăртма музыка ертÿçи В.Е.Романов пулăшса пычĕ. Юмахри сăнарсене выляс енĕпе Н.В.Паденова, Н.А.Мидакова, Г.Ю.Романова, И.В. Чубайкина, А.А.Кодякова, А.В.Пигильдина, Л.Л.Герасимова, Н.Н.Сазонова тата Н.В.Ермолаева активлăх кăтартрĕç. Ачасене кăна мар, вĕсен ашшĕ-амăшĕсене те асăннă юмах килĕшнĕ. Ачасем хăйсем юмах лартнисĕр пуçне малашне те чĕр чунсен е тĕрлĕ сăнарсен ролĕсенче ашшĕ-амăшĕсене курма хавас пулнине пытармарĕç.