08 апреля 2009 г.
«Чи лайăх арçын ролĕ» номинацире пирĕн районта çуралса ÿснĕ, К.Иванов ячĕллĕ Чăваш академи драма театрĕн артисчĕ Николай Котеев тивĕçнĕ.
Чăваш Енре артистсен хушшинче палăрнисене çуллен хавхалантарасси тахçанах йăлана кĕнĕ ĕнтĕ. Кăçалхи «Чĕнтĕрлĕ чаршав» конкурсăн пĕтĕмлетĕвĕ артистсене мартăн 27-мĕшĕнче – шăпах Пĕтĕм тĕнчери театр кунĕнче – Шупашкарти Вырăс драма театрне пухрĕ.
Сцена ăстисене малтанах ЧР культура министрĕ Роза Лизакова, Раççей театр ĕçченĕсен союзĕн секретарĕ, Чăваш Ен театр ĕçченĕсен союзĕн председателĕ, СССР халăх артисчĕ Валерий Яковлев саламларĕç, ăшă сăмахсем каларĕç, «Чĕнтĕрлĕ чаршав» пĕр вăхăтрах уяв тата çивĕч ăмăрту пулнине палăртрĕç.
«Театр ултава кăткăс лабиринтран кăларать, кун çутинче унăн тÿнтер енĕсене кăтартать», – тесе Ф.Шиллер ахальтен каламан. Сцена çинче чупса-вĕçсе çÿреме, чăнлăха чуна витермелле калăпласа куракана савăнтарма-йĕртме çуралнăскерсем пурнăçăн тÿнтер енĕсене халăха кăтартса параççĕ, тÿрĕ çулпа утма вĕрентеççĕ. Вĕсен ĕçне урăх нимĕнле профессипе те танлаштараймăн, артистсем пуринчен те уйрăлса тăраççĕ: тăрăшса премьера хатĕрлеççĕ, театр репертуарне пуянлатаççĕ, наци культурине çÿллĕ шая çĕклеççĕ. Сăмах май, Чăваш Енри театрсем иртнĕ çул 21 премьера хатĕрленĕ, 8 спектакле тĕпрен улăштарнă, çĕнетнĕ. Пĕлтĕр лартнă 1500 спектакле 311 пин çын кайса курнă.
«Чĕнтĕрлĕ чаршав» уяв кăна мар, чăн малтанах вăл – конкурс. Çĕнтерÿçĕсене сакăр номинаципе палăртрĕç. Вăл е ку енĕпе кам мала тухнине тÿрех пĕлтермен, çавăнпах артистсем те, театра кăмăллакансем те, çĕнтерÿçĕсен ячĕсене калакансем те пăлханчĕç.
Иртнĕ çулта палăрнă театр ĕçченĕсене РФ Чрезвычайлă лару-тăру министерствин Чăваш Енри управленийĕн пуçлăхĕ Олег Андреев, СССР тава тивĕçлĕ спорт мастерĕ, ЧР Патшалăх Канашĕн депутачĕ Елена Николаева, Федерацин айăплакан службин Чăваш Енри управленийĕн пуçлăхĕн çумĕ Вячеслав Степанов, ЧР Юстици министрĕ Валерий Петров, ЧР ШĔМĕн министрĕн пĕрремĕш çумĕ Вячеслав Яковлев, РФ наркотик çаврăнăшне тĕрĕслекен службин Чăваш Енри управленийĕн пуçлăхĕн пулăшуçи Владислав Леонтьев, Президент перинаталь центрĕн тĕп тухтăрĕ Алла Самойлова, тĕнче класлă спорт мастерĕ Андрей Абрамов тата ыттисем саламларĕç, тивĕçнĕ наградăсене пачĕç.
«Спектакле илемлетнĕ чи лайăх кĕвĕ» номинацире харăсах икĕ çĕнтерÿçĕ: Çамрăксен театрĕн «Когда поют светофоры» пьесине илемлетнĕ Лолита Чекушкинапа Пукане театрĕн «Хупах хăлха Илюк» юмахне капăрлатнă Андрей Галкин. «Чи лайăх сценографи» номинацире Çамрăксен театрĕн художник-оформителĕ Ольга Ежкова палăрчĕ («Ромео и Джульетта» мюзиклшăн). «Эпизод ролĕнчи чи лайăх актер» ята Чăваш патшалăх оперăпа балет театрĕн солистки Татьяна Русановская тивĕçрĕ (И.Кальманăн «Мистер Икс» опереттинче Каролина партине вылянăшăн). «Музыка спектаклĕнчи чи лайăх парти» номинацире те çав театрăн артисткиех – Ольга Вильдяева – палăрчĕ. Вăл П.Масканьин «Сельская честь» оперинчи Сантуцци партине ăста юрланă.
«Чи лайăх хĕрарăм ролĕ» номинацире, палăртрăмăр ĕнтĕ, Çамрăксен театрĕн артистки Ольга Почалкина çĕнтерчĕ. «Чи лайăх арçын рольне» вара пĕлтĕр К.Иванов ячĕллĕ чăваш академи драма театрĕн артисчĕ Николай Котеев А.Толстойăн «Куккук куççулĕ» спектаклĕнче вылянă.
Чăваш академи драма театрĕ лартнă А.Павловăн «Вĕр, вăштăр çил» постановки тата Вырăс драма театрĕн «Странная миссис Сэвидж» (Д.Патрик) ĕçĕ «Çулталăкри чи лайăх спектакль» номинацире палăрчĕç.
«Чĕнтĕрлĕ чаршав» конкурс жюрийĕн ятарлă дипломне тата укçан премие иккĕн тивĕçрĕç: Пукане театрĕн илемлĕх ертÿçи Юрий Филиппов («Хупах хăлха Илюк» спектакльшăн) тата «Тантăш» хаçат редакцийĕн фотокорреспонденчĕ Сергей Журавлев («Актеры Чувашии» кĕнекишĕн). Раççей театр ĕçченĕсен союзĕн дипломне ЧР халăх артисткине Галина Холопцевана, ЧР Театр ĕçченĕсен союзĕн дипломне Чăваш академи драма театрĕн артисткине Марина Яковлевана пачĕç.
Уявра тухса каланă сăмахсемпе килĕшес килет: артистсен малашне те куракансене çĕнĕ спектакльсемпе савăнтарма хавхалану, чун туртăмĕ пултăр.