15 апреля 2009 г.
Иртнĕ эрне кун ял тăрăхĕсем хушшинчи культурăпа кану центрĕнче чи лайăх художество пултарулăх коллективĕсен смотр-отчечĕн гала-концерчĕ тĕлĕнмелле аван пулчĕ. Вырăс поэчĕ А.Фатьянов – 90 çул, Çеçпĕл Мишши – 110 çул тултарнине халалласа ирттернĕскер, Хĕрлĕ Чутай çыннисен кăмăлне тивĕçтерме пултарчĕ. Районта чăннипех талантлă, пултаруллă, ăста коллективсем, уйрăм çынсем пуррине халăх тепĕр хут курса ĕненчĕ.
Гала-концерта А.Самсонов хăйĕн мăнаçлă сассипе юрă шăрантарса пуçларĕ. Унтан пултарулăх коллективĕсем, ташă ушкăнĕсем, пĕччен юрлакансем хăйсен ăсталăхĕпе паллаштарчĕç. Уйрăмах залри халăх Штанаш тăрăхĕнчи ташă ушкăнне, Н.Майоровăн "Каçарсам" юррине хапăл туса йышăнчĕ. Л.Мадебейкина шăрантарнă "Бабье лето" юрă та кăмăла кайрĕ.
"Кураж" ташă ушкăнĕ те килĕшрĕ. Çеçпĕл Мишшин "Хурçă шанчăк" сăввине О.Тимофеева сăнарлăн вуласа панипе асра юлчĕ.
Чăннине каласан, гала-концерта кашни ял тăрăхĕнчен чи талантлисем хутшăнчĕç, вĕсене асăнса та çитереймĕн. Кашни номерĕ хăйне евĕрлĕхĕпе тыткăнларĕ. Çавăнпа та вĕсене халăх тăвăллăн алă çупса йышăнчĕ. Маттур-çке пирĕн Чутай ен çыннисем!