15 апреля 2009 г.
Пĕтĕм Раççей халăх çыравне хатĕрленсе районта 11 комисси йĕркеленĕ. Хĕрлĕ Чутай, Ачкасси, Хусанушкăнь, Пантьăк, Тралькасси ял тăрăхĕсенче çырава хатĕрленсе пĕрер лару пулнă, Атнар, Мăн Этмен, Питĕркасси, Кив Атикасси, Штанаш ял тăрăхĕсенче – икшер. Районти çырав комиссийĕ вара 3 лару ирттернĕ.
Хальхи вăхăтра пур ял тăрăхĕнче те адрес хуçалăхĕсен лару-тăрăвне йĕркене кĕртессипе ĕçсем пыраççĕ. Ял тăрăхĕсен пуçлăхĕсен апрелĕн 1-мĕшĕ тĕлне панă информацие тĕпе хурсан, 70 яла тĕрĕсленĕ, унти 4912 çуртăн номер паллисем пур. Сăмах май, Атнар ял тăрăхĕнче те халăх çыравне хатĕрленсе тăрăшса ĕçлеççĕ: кунта çуртсене номерлемелли паллăсене хатĕрлесе çитернĕпе пĕрех, халĕ вĕсене вырнаçтарассипе тимлеççĕ. Атнарсем ку енĕпе ĕçе 70 процент пурнăçланă ĕнтĕ. Калас пулать, Атнар ял тăрăхĕнче çуртсене номерлемелли паллăна ятарлă оракал пленкăпа илемлетсе ăсталанă.