22 апреля 2009 г.
Вячеслав Андреевичпа Алена Олеговна Молодейкинсене Тихăнушкăнче ĕçчен çемье пек пĕлеççĕ. 15 çул пĕрле пурăнаççĕ ĕнтĕ вĕсем. Пĕр-пĕрне çур сăмахранах ăнланма хăнăхнă. Çавăнпа-тăр шухăшĕсем те пĕрешкел – районта лаша спорчĕн шкулне уçасси.
Хăй вăхăтĕнче Молодейкинсем çичшер лаша тытни те пулнă. Паянхи кун та юратнă "Полюспа" "Ангорка" лашасене асра тытаççĕ. Вĕсем кил хуçалăхĕнче сахал мар пулăшнă. Уйрăмах çурт çĕкленĕ чухне. Халĕ çемье 2 лаша – "Сюрприз" тата "Сказка" тытать. Вĕсенчен кашни 100000 тенкĕне яхăн тăрать. Лашасене ятарлă программăпа чупăва хатĕрлеççĕ.
Иртнĕ çул А.Николаев космонавта халалласа Етĕрне хулинче лашасен чупăвĕ иртнĕ. Унта республикăри чи çивĕч урхамахсем хутшăннă. Ку ăмăртура "Сюрприз" та пулнă. 2008 çулта çеç çак лаша чупăва хутшăнса малти вырăнсене çĕнсе илме пултарнă. Районти кăçалхи Хĕл ăсатăвĕнче те Молодейкинсен хуçалăхĕнчи лашасем парнене тивĕçнĕ.
Вячеслав Андреевичпа Алена Олеговна ывăлпа хĕр çитĕнтереççĕ. Вĕсем патне хăнана кÿршĕри Настя та çÿрет. Вăл урхамахсемпе кăсăкланать. Вячеслав Андреевичăн шухăшĕпе, унран чăн-чăн жокей пулать.