25 апреля 2009 г.
Çулсеренех районти культурăпа кану центрĕнче пирĕн тăрăхран çуралса ÿснĕ чаплă юрăçсене Иван Охливанкинпа Григорий Петрова халалласа фестиваль-конкурс ирттереççĕ. Кăçалхи V фестиваль апрелĕн 21-мĕшĕнче пулнă.
Фестивале çамрăк талантсене тупса палăртса вĕсен пултарулăхне ÿстерме майсем туса парас тĕллевпе йĕркелеççĕ. Кăçал та Чутай енĕн чылай таланчĕ сцена çине тухнă, юрлас ăсталăхпа паллаштарнă.
Фестиваль икĕ тапхăрпа иртнĕ. Чи малтанах конкурсантсем халăх юррисемпе сцена çине тухнă, унтан автор юррисене шăрантарнă. Кăçалхи фестиваль-конкурсри тепĕр çĕнĕлĕх пирки те асăнмалла – тупăшăва кÿршĕллĕ районсенчи вокалистсем те хутшăнма пултарнă. Унта вара Çĕмĕрле районĕнчи Саланчăкри искусство шкулĕн вĕренекенĕсем килсе çитнĕ.
Пĕтĕмлетÿсем çапларах: 8-12 çулсенчи талантсем хушшинче пĕрремĕш вырăна юрă юрлассипе Саланчăкри искусство шкулĕн вĕренекенĕ А.Кузьмин тивĕçнĕ. Çак ушкăнрах Питĕркасси шкулĕнчи В.Жуков иккĕмĕш пулнă. Арçын ача халăх тата автор юррисене ăста шăрантарнă. Виççĕмĕш вырăна вара тивĕçлипех Е.Ефремова (Саланчăк) йышăннă.
13-15 çулхисен кĕрешĕвĕнче Чутай ен таланчĕсем пултарулăхпа чăннипех тыткăнланă. Р.Хан «Как пойду я на быструю речку», «С добрым утром» юрăсене ăста шăрантарса çĕнтернĕ. Иккĕмĕш вырăна О.Скворцова тивĕçнĕ. Вăл «Тăри юрри», «Музыка звучит» юрăсемпе асра юлнă. Ку ушкăнра виççĕмĕш вырăна А.Байбаторова (Саланчăк) çĕнсе илнĕ.
16-20 çулсенчи талантсем хушшинчи тупăшура юрлас ăсталăхпа хĕрлĕчутайсем палăрнă. А.Данилова «Пряха», «Ласточка» юрăсемпе куракансене тыткăнланă – çĕнтерÿçĕ ята тивĕçнĕ. О.Тимофеевапа («Заболела Дунина голова», «Калитка») В.Улянды («Как-то ранним утром», «Льется песня») вокалистсен номерĕсене те пысăк хак панă. Вĕсем – иккĕмĕш вырăнта. Виççĕмĕш – Е.Семенова (Саланчăк).
Куракансем кашни номерех хапăл туса йышăннă. Жюри членĕсем Чутай ен çамрăк талантсемпе пуян, вĕсен пултарулăхĕ иксĕлми пулнине палăртнă.