20 мая 2009 г.
Майăн 18-мĕшĕнче район пуçлăхĕ предприятисемпе учрежденисен ертÿçисемпе, райадминистрацин пай начальникĕсемпе тунти кунсерен йĕркелекен йăлана кĕнĕ планерка ирттерчĕ.
Планеркăра пухăннисем ытларах иртнĕ эрнере мĕнле ĕçсем туса ирттерни пирки калаçрĕç тата умри тĕллевсене палăртрĕç.
Район пуçлăхĕн пĕрремĕш çумĕ А.П.Самылкин пĕлтернĕ тăрăх, кăçал çурхи культурăсене пĕлтĕрхинчен самаях чылай акса хăварнă. Çавăн пекех майăн 22-мĕшĕнче Выльăх-чĕрлĕх пăхакансен кунĕ пулĕ. Çурхи ĕçсене вĕçленĕ ятпа Ĕçпе юрă, спорт уявĕ – Акатуй – июнĕн 12-мĕшĕнче яланхи пекех "Чавал" уçланкăра иртĕ.
Район пуçлăхĕн çумĕ, вĕрентÿ пайĕн начальникĕ Т.Н.Шереметьева РФ Президенчĕн грантне çĕнсе илессишĕн районти 21 вĕрентекен документсем тăратни пирки, вĕсенчен пĕри сумлă гранта çĕнсе илме пултарни çинчен, республикăри çамрăк инспекторсен "Шанчăклă кустăрма" слетĕнче Хĕрлĕ Чутай шкулĕнчи Э.Романов педагогăн вĕренекенĕсем малти вырăна çĕнсе илнине каларĕ, унтан республикăри "Самый классный классный" конкурса виçĕ учитель хутшăннине, майăн 23-мĕшĕнче шкулсенче 9-мĕшпе 11-мĕш классенче вĕренекенсемшĕн юлашки шăнкăрав янрассине тата майăн 26-мĕшĕнче Пĕрлехи патшалăх экзаменĕ математикăпа пулассине пĕлтерчĕ.
Райадминистрацин социаллă аталану пайĕн начальникĕ А.Н.Самсонов районти клубсене модернизацилес тĕллевлĕ республикăри конкурса хутшăнасси пирки пĕлтерчĕ.
Социаллă ыйтусемпе тивĕçтерекен центрăн директорĕ М.В.Глухова иккĕмĕш çул ĕнте республикăри конкурсра "Чи хăтлă çурт" номинацие Атнарти Ваттисен çурчĕ çĕнсе илнине пĕлтерчĕ.
Çавăн пекех планеркăна пухăннă ертÿçĕсене район пуçлăхĕ А.И.Криков районти ĕçпе тивĕçтерекен центрта учетра тăракан çынсене ĕç вырăнĕ тупса парас тĕллевпе тăрăшма хушрĕ.
Планеркăра пухăннисем ытти çивĕч ыйтăва та сÿтсе яврĕç.