23 мая 2009 г.
Пушар тип шар кăтартать тесе ахальтен каламан. Вăл, чăнах та, хăйĕн хыççăн кĕл купи çеç хăварать. Акă, майăн 20-мĕшĕнче, кăнтăр иртсен, Уйпуç ялĕнче пулнă инкек те çакна çирĕплетет. Çак кун Галина Владимировна Николаеван кил-çурчĕ, хуралтăсем тĕппипех çунса кайнă. Кил хуçи хĕрарăмне аран çăлса хăварнă. Урса кайнă «хĕрлĕ автан» кÿршĕри Ольга Федоровна Дементьеван сарайĕ çине куçнă. Пушарнăйсен хастарлăхĕпе çеç вут-çулăма парăнтарнă. Экспертсем инкек сăлтавне тĕпчеççĕ.
Сăмах май, район территорийĕнче пушарсен шучĕ кăçал чылай ÿснĕ – 20 тĕслĕх. Çавăнпа çынсен асăрханулăх çинчен пĕрре те манмалла мар.