06 июня 2009 г.
Шупашкарта иртекен Пĕтĕм тĕнчери кинофестиваль июнь уйăхĕн 1-мĕшĕнчех ĕçлеме пуçларĕ, анчах савăнăçлă лару-тăрура вăл июнĕн 2-мĕшĕнче çеç "Çеçпĕл" кинотеатрта уçăлчĕ. Сумлă, тĕнчипе паллă фестивальсен йĕркине халĕ та пăсмарĕç: хăнасем – актерсемпе режиссерсем, жюри членĕсем... – хĕрлĕ кавир тăрăх утса кĕчĕç. Шупашкар çыннисем вĕсене алă çупса йышăнчĕç, фотожурналистсем çăлтăрсен кашни самантне ÿкерсе илме тăрăшрĕç.
Иккĕмĕш хут иртет Чăваш Енре пысăк шайри фестиваль. Çĕнĕ ĕçе йĕркелеме хăнăхса пыни куç умĕнчех – çак тапхăрта кăтартакан фильмсен шучĕ 80 ытла тата фестивале хутшăнакансен йышĕ те çавăн чухлех. Июнь уйăхĕн 3-мĕшĕнче çеç "Çеçпĕл" кинотеатра 35 артистпа режиссер, продюсер пынăччĕ. Аса илтерер: хăшĕ (Раççей халăх артисчĕсем Ирина Скобцева-Бондарчук, Юрий Чернов) Шупашкарпа сыв пуллашма ĕлкĕрнĕ те ĕнтĕ, СССР халăх артисчĕ Эльдар Рязанов вара вĕçсе çеç çитнĕ.
Кино тусĕсем фестивале савăнăçлă лару-тăрура уçнă самантра унăн президенчĕ, Раççей халăх артисчĕ Карен Шахназаров хăй пуласса кĕтнĕччĕ. Карен Георгиевич куракансемпе фестивале хутшăнакансене пысăк экранран саламларĕ. Сцена çинчи ытти ĕçе кинофестивалĕн пултарулăх ертÿçи, "Кинопроцесс" журналăн тĕп редакторĕ, Раççей кинематографи искусствисен академийĕн членĕ Вячеслав Шмыров пурнăçласа пычĕ.
Пирĕн Шупашкарăмăра çитсе курма, унта пурăнакансемпе паллашма: ентешĕмĕр Александр Хван режиссер, Рустем Абдрашев кинорежиссер, Аида Соболева кинорежиссер, Раççей халăх артисчĕсем Светлана Дружинина, Анатолий Мукасей, Юрий Грымов кинорежиссер, Елена Стишова кинокритик, Зола Пак композитор, Владимир Эйснер писатель, Алексей Герман-кĕçĕнни кинорежиссер... Илемлĕ фильмсен конкурсĕн председателĕ, Раççей халăх артисчĕ Родион Нахапетов вара Лос-Анджелесран васкаса çитнĕ. Çак çынна – режиссера, актера, сценариста, продюсера – тĕлĕнтерме пĕлмелле те мар пек. 40 ытла фильмра ÿкерĕннĕ тата чылай ĕç кăларнă çыншăн та Шупашкарта савăнмалли пулнă-мĕн. Пĕрремĕш сăлтавĕ – Атăл çинчи çак илемлĕ хулана çитсе курни, иккĕмĕшĕ – харăсах çакăн чухлĕ фильмпа паллашма май килни.
Документлă фильмсен конкурсĕн жюри председательне, публициста, кинокритика, Раççей Федерацийĕн Общество палатин членне Алла Гербера та Шупашкар хăйĕн тирпейлĕхĕпе, хăтлăхĕпе, çыннисен тараватлăхĕпе тата ăшшипе килĕшнĕ. "Начар кăмăлпа тухнăччĕ Мускавран, сирĕн хулана çитрĕм те чун уçăлса кайрĕ", – терĕ Алла Ефремовна.