11 июня 2009 г.
Майăн 19-мĕшĕнче район больницинче мана операци турĕç. И.В.Игнатьевпа Н.А. Ярабаев врач-хирургсем тăрăшнипе ку ĕç ăнăçлă иртрĕ тесе шутлатăп эпĕ, вăхăчĕ нумай иртмерĕ пулин те. Асăннă хирургсем хăйсен ăс-тăнĕпе пĕлĕвне кăна мар, пĕтĕм чун хавалне парса çынна тĕрлĕ чир-чĕртен çăлса хăварассишĕн вăй хураççĕ. Ăшă сăмах чирлĕ çыншăн эмелрен те сиплĕрех пулнине вĕсем нихăçан та манмаççĕ. Çавăнпа та вĕсене çынсем ырăпа асăнаççĕ.
Операци хыççăн мĕн пулса тухрĕ-ха; Майăн 20-22-мĕшĕсенче çанталăк ăмăрлă, çиллĕ, сивĕ тăчĕ. Çав вăхăтра Шупашкартан Сывлăх министерствинчен килеççĕ тесе палатăсенчи чÿречесен хушăкĕсене хĕле хирĕç чиксе хунă çĕтĕк-çатăка, ваткăсене тата çыпăçтарнă хутсене йăлтах сÿтсе пăрахрĕç.Чирлисем выртакан палатăсенче вара тÿсме çук сивĕ çил витĕр вĕрсе тăчĕ, алă-ура кăна мар, хăлхасем те шăнчĕç. Çăм нускисем, ăшă шăлаварсемпе свитерсем тăхăнса, икшер утиялпа витĕнсе выртсан та ăшăнма çукчĕ. Чÿрече рамисем хушшине алă пÿрнисем кĕреççĕ, шăшисем кĕрсе тухас пулсан та чару çук. Пĕр ирхине тăрсан вара пĕр-пĕрне сăнарăмăр – пĕрин сăмси юхать, теприн питĕрĕнсе ларнă, виççĕмĕшĕ ÿсĕрет те сунаслать. Кусем пурте операци хыççăнхискерсем. Шупашкартан килнисем вара пĕри те чирлисем патне пырса курмарĕç. Ман вĕсем патне пĕртен-пĕр ыйту пурччĕ: пире кунта сыватма вырттарнă е асаплантарма!; Çук пулмарĕ. Анчах та кунта пире сыватакан хирургсем айăплă мар. Ку ĕç йăлтах çÿлтен хушнипе пулса пычĕ.
Эпĕ вара хама хам тăшман пулас мар тесе операци хыççăн тăваттăмĕш кунхинех киле тухса кайрăм, çĕвĕсене сÿттерме виçĕ кунтан килтĕм. Мана, таса "холодильникре" выртса тăриччен, ăшă витере лайăхрах пек туйăнать.