11 июня 2009 г.
Эмел курăкĕсене пухасси – усăллă ĕç. Хăшĕ-пĕри ку енĕпе 10-15 çул та тăрăшать, пĕр сезонта райпон хатĕрлев пунктне пĕр тонна майлă типĕтнĕ эмел курăкĕсене пухса парса 30-40 пин тенкĕ ĕçлесе илет. Уйрăмах шкул ачисем сиплĕ курăксене пуçтарассипе хастарлăх кăтартаççĕ, чи тăрăшуллисем республикăри конкурсăн çĕнтерÿçисем пулса тăраççĕ. Çакна Чăвашпотребсоюз курăк пухассипе вĕренекенсем, кооператив организацийĕсем, шкул коллективĕсем хушшинче ирттернĕ республика конкурсĕн пĕтĕмлетĕвĕпе çирĕплетме пулать. Ăмăртăвăн пĕтĕмлетĕвĕпе килĕшÿллĕн, çут çанталăх ырлăхне пухассипе ытларах шкул ачисем тăрăшнă, вĕсене ĕçне кура укçан преми парса хавхалантарнă. Сăмахран, Хĕрлĕ Чутай шкулĕнче вĕренекен Никита Хохлов иртнĕ çул 900 килограмм эмел курăкĕ (типĕтни) пухса 15400 тенкĕ укçа ĕçлесе илнĕ. Çак шкултах пĕлÿ пухакан Лилия Герасимова та сиплĕ курăксене пухса премие тивĕçнĕ.
Эмел курăкĕсене пухасси тупăшлă. Уйрăмах кризис вăхăтĕнче вăл çемье бюджетне пуянлатмалли тĕп çăл куçсенчен пĕри пулса тăрать. Апла пулсан вĕсене хатĕрлев пунктне пуçтарса пама ÿркенер мар.