11 июня 2009 г.
Хĕр ача лаша спорчĕпе интересленни сайра тĕл пулкалать. Акă, СХТ территорийĕнче пурăнакан вăрçă ветеранĕн З.Д.Кудряшовăн мăнукĕ – Настя Сидорова килте урхамах тытать. Сăмах май, Настя иртнĕ çул «Санкинский» хуçалăхра лашасем пăхнă çĕрте ĕçленĕ.
Хăй каланă тăрăх, Настя мĕн пĕчĕкрен лашасене юратса ÿснĕ. Çак хăнăху унăн ÿснĕçемĕн аталанса пынă. Пушă вăхăта вăл «Гроза» ятлă урхамахпа ирттерет, унпа хире тухса çÿрет, ăна тĕрлĕ чăрмавсем урлă сикме хăнăхтарать.«Гроза» уншăн темрен те хаклă. Унпа вăл республикăра иртекен лаша спорчĕн чупăвне час-часах хутшăнать. Çав хушăрах районта иртнĕ уявсене юлан утпа тухса халăха савăнтарни те пулнă. Хальхи вăхăтра хĕр çывăх тусĕпе Етĕрне районĕнче иртекен чупăва хатĕрленет. Тен, малашлăхра Настьăна пысăк спортра курăпăр.
Пушă вăхăтра вара çамрăк ачасене лаша çинче ярăнтарать. Шăпăрлансем юлан ут çинче ларса çÿреме тем пекех хавас.