01 июля 2009 г.
Çамрăксем тин çеç хăйсен пĕлĕвне экзаменсенче тĕрĕслетчĕç. Акă ĕнтĕ ППЭ те вĕçленчĕ, ĕнерхи выпускниксем аслă шкулсене кĕме хатĕрленеççĕ. Апла пулсан вĕсем Пĕрлехи патшалăх экзаменне кăçал мĕнле тытнине тишкерме вăхăт.
Кăçал 11-мĕш классем икĕ предметпа – вырăс чĕлхипе тата математикăпа – обязательнăй йĕркепе экзамен тытрĕç. Районти вĕрентÿ пайĕн кăтартăвĕсене тĕпе хурсан, вырăс чĕлхипе районĕпе вăтам балл 60,22. Шкулсемпе илсен, Хĕрлĕ Чутай шкулĕнче ăс пухакансен, ыттисемпе танлаштарсан, ку предметпа балл пысăкрах – 66,9, атнарсен – 66, мăнэтменсен – 57, 19, питĕркассисен – 55,13, çĕнатикассисен – 54,91. Математикăпа вăтам балл районĕпе – 55,90. Ку предметпа Атнар шкулĕнче вĕренекенсем 64,30 балл пухнă, Хĕрлĕ Чутай – 59,32, Çĕн Атикасси – 54, 35, Питĕркасси – 53, 25, Мăн Этмен – 51, 40.
Истори предмечĕпе Мăн Этмен шкулĕн кăтартăвĕ 55 балпа танлашать, Атнар – 54, Хĕрлĕ Чутай – 52, 75, Çĕн Атикасси – 51. Биологипе Çĕн Атикасси – 66,50, Хĕрлĕ Чутай – 65,80 Атнар – 63, Мăн Этмен – 49,80, Питĕркасси – 42. Физикăпа Атнар – 51,80, Мăн Этмен – 51,29, Хĕрлĕ Чутай – 48,50, Çĕн Атикасси – 43,14, Питĕркасси – 42,50. Акăлчан чĕлхипе Хĕрлĕ Чутай шкулĕн – 71 балл. Химипе Çĕн Атикасси – 68, Хĕрлĕ Чутай – 59,67, Мăн Этмен – 50. Географипе Хĕрлĕ Чутай – 67, Атнар – 64. Обществознанипе Питĕркасси – 58,75, Атнар – 58, Хĕрлĕ Чутай – 57,16, Мăн Этмен – 55,39, Çĕн Атикасси – 48,71.
Вĕренекенсем ППЭ тытма ытларах çак предметсене суйласа илнĕ: физика (29), истори (26 ача), биологи (25). Обществознанипе вара 74 çамрăк пĕлĕвне тĕрĕсленĕ. Çав хушăрах вара вырăс литературипе тата нимĕç чĕлхипе пĕр вĕренекен те экзамен тытма кăмăл туман.
Районти пĕр вĕренекен те 100 балл пухайман. Республикипе илсен вара, кун пеккисен хисепĕ, иртнĕ çулхипе танлаштарсан, нумайрах: 64 выпускник (2008 çулта – 32).
Шел пулин те, кăçал районти 3 ача обязательнăй йĕркепе тытмалли экзаменсенче тивĕçлĕ балл пухайман, çавна май вĕсем вăтам шкул пĕтернине çирĕплетекен аттестата алла илеймеççĕ. Апла пулсан çак çамрăксемшĕн кăçал ВУЗсене çул хупă. Çапах та пуçа усмалла мар, мĕншĕн тесен вĕсем тепĕр çул каллех ППЭ тытса хăйсен ĕмĕт-тĕллевне пурнăçлаяççĕ. Республикипе илсен, кăçал пурĕ 81 ачан (математикăпа тата вырăс чĕлхипе) кăтартăвĕсем чи пĕчĕк балăн хисепне те çитеймеççĕ. ППЭ тытайманнисене мĕнле пулăшмалла-ши; Вĕрентÿ министерстви аттестат илеймен выпускниксем валли профтехучилищăсенче ĕç специальноçĕпе васкавлă вĕрентĕвĕн ушкăнĕсене уçасса пĕлтерет.