01 июля 2009 г.
Иртнĕ эрне кун «Чавал» уçланкăра Раççей çамрăкĕсен кунне халалласа республикăри райпо коллективĕсен спортпа туризм слечĕ иртрĕ. Унăн ĕçне потребкоопераци ĕçченĕсен тата предпринимательлĕхĕн Чăваш Республикинчи профсоюзĕн председателĕ Г.Я.Стексов ертсе пычĕ. Слета район пуçлăхĕ А.И.Криков та хутшăнчĕ.
Ку республикăри райпо тытăмĕнче тăрăшакансен профсоюз членĕсем хушшинчи пĕрремĕш слечĕ пулчĕ. Ăна спортпа туризма аталантарас, сывлăха çирĕплетес тĕлĕшпе ирттерчĕç. Тупăшăва пилĕк команда килсе çитрĕ: Чăвашпотребсоюз ĕçченĕсем, пăрачкавсем, çĕрпÿсем, сĕнтĕрвăррисем тата хĕрлĕчутайсем.
Чи малтанах спортсменсене слет уçăлнă ятпа Г.Я. Стексов саламларĕ. А.И. Криков хăнасене районти чи илемлĕ вырăнта сывлăха çирĕплетме, стартра ăнăçу сунчĕ. Районти потребительсен обществин председателĕ А.Ю.Степанов профсоюз членĕсене кĕрешÿре çĕнтерÿ тума чĕнсе каларĕ.
Тупăшу, чăнах та, хĕрÿ иртрĕ. Шăпа тăрăх, хĕрлĕчутайсем пиллĕкмĕш номерпе кĕрешрĕç. Унччен ыттисен ăнăçăвĕсемпе çухатăвĕсене сăнарĕç. Спортсменсем старта çивĕч пуçларĕç. Анчах кайран уçланкăра палатка пухса лартасси, ăна салатса каялла пуçтарасси, вĕренрен тĕвĕсем çыхасси, дартс пересси, вăрманта суранланнă çынна пирвайхи пулăшу парасси, çырма урлă вĕрен, унтан пĕрене тăрăх каçасси, чăтлăхран çухалса каймасăр тĕрĕс-тĕкел тухасси, пытарнă мула тупасси, вучах чĕртсе шыв вĕретесси, вăхăта сая ямасăр финиша çитесси пуриншĕн те йывăр пулчĕ. Çак ĕçсене пурнăçлассишĕн çамрăксен нумай тар тăкма тиврĕ. Ют район çĕрĕ çинче пулнăран-ши трассăран пăрăнса каякансем те пулчĕç. Çавăнпах хăшĕсен балсем чакрĕç. Тÿрех тавçăрса илейменнисем те çухату тÿсрĕç. Хĕрлĕчутайсем маршрут çинче ыттисенчен сахалрах йăнăшрĕç. Хăвăртлăх енĕпе шутласан, райпон "Чаваляне" команди пĕрремĕш пулчĕ. Ытти енĕпе илсен те вĕсем малтисем пулчĕç. Капитансен кĕрешĕвĕнче те В.Ярайкин ыйтусем çине тĕрĕс хуравласа нумай балл пухрĕ. Çапла вара, хĕрлĕчутайсем тĕрлĕ енлĕн кĕрешсе пурне те парăнтарчĕç. Иккĕмĕш – Сĕнтĕрвăрринчи райпо коллективĕ, Чăвашпотребсоюз ĕçченĕсем виççĕмĕш пулчĕç.
Çĕнтерÿçĕсене туризм енĕпе кирлĕ инвентарьпе тата Хисеп грамотипе хавхалантарчĕç. Райпо председателĕ А.Ю.Степанов районта слет ирттерме майсем туса панăшăн Тав çырăвне тивĕçрĕ. Слета хутшăннă ытти командăсем те парнеллĕ пулчĕç.
Слет пуриншĕн те усăллă иртрĕ. Потребкоопераци ĕçченĕсем тупăшрĕç, сывлăха çирĕплетрĕç, пĕр-пĕринпе курса калаçрĕç.