22 июля 2009 г.
Иртнĕ эрне кун Чăваш Ен Президенчĕ Николай Федоров Нигери Федераци Республикин Коги штачĕн делегацине – ăна Алхаджи Ибрахим Идрис кĕпĕрнаттăр ертсе пырать – тата Нигери Федераци Республикин Раççей Федерацийĕнчи Чрезвычайлă тата Полномочиллĕ Посолне Тимоти Май Шелпида йышăннă.
Калаçу вăхăтĕнче пĕр-пĕринпе нумай çул килĕштерсе тата ăнăçлă ĕçлес шухăш-кăмăл палăрнă. Уйрăммăн илсен, тĕл пулура ял хуçалăхĕ, сăрт-ту промышленноçĕ, ытти отрасль валли Раççейре хатĕрлекен трактор техникине Нигерие сутас ыйтусене сÿтсе явнă. "Трактор завочĕсем" концернпа алла-аллăн ĕçлеме палăртнă конкретлă проектсем икĕ патшалăхăн – Нигерипе Раççейĕн – хăватне пурнăçа кĕртес ĕçре пĕлтерĕшлĕ тĕслĕх пулма пултараççĕ", – тенĕ Николай Федоров Президент. Ĕçтешлĕхе нумай енлĕ çирĕплетме кирлине палăртса Нигери делегацийĕн представителĕсем "Промтрактор" АУО-ра туса кăларакан продукцие пысăка хурса хакланă. "Кусем, – тенĕ хăнасем, – питĕ кăсăк тата пысăк пахалăхлă машинăсем".
Нигери Федераци Республикин Коги штачĕн кĕпĕрнаттăрĕ Алхаджи Ибрахим Идрис, Шупашкара пуçласа килнĕ май, тĕп хула хăтлăхĕнчен тĕлĕннĕ. "Мĕн тери хитре, таса хула – пурне те кирлĕ пек йĕркеленĕ. Кунта пурăнакансен пурнăçĕ те лăпкă", – пĕлтернĕ вăл. – Хĕпĕртерĕм. Киле таврăнсан штатри тата тĕп хулари ĕç-хĕле те сирĕнни евĕр йĕркелеме тăрăшăп".
Чăваш Ен Президенчĕ хăнасем валли экскурси ирттернĕ. Вăл тата Нигери делегацийĕн членĕсем арçынсен Таса Троица мăнастирĕнче пулса курнă, ытти паллă вырăнпа паллашнă.