22 июля 2009 г.
Юрий Алексеевич Савельева Атнар тăрăхĕнче пĕлмен çын та çук. Мĕншĕн тесен вăл «Коминтерн» хуçалăхра водительте нумай çул ĕçлет. Пĕр хушă вăрман хуçалăхĕнче тăрăшнă. Пĕтĕмĕшле илсен, вăл руль умĕнче 1970 çултанпа ларать. Çур акинче хăйне шанса панă техникăпа вăрлăх турттарнă, минерал удобренийĕсем хире кăларнă. Вырма вăхăтĕнче ăнса пулнă тыр-пула комбайнсем çинчен йĕтем çине леçĕ. Хĕллехи вăхăтра та ун валли ĕç тупăнсах тăрать. Ĕмĕр тăршшĕпех иртен пуçласа сĕм çĕрлечченех вăл хĕрÿ ĕçре. «Шанчăклă водитель», – тет ун пирки кооператив ертÿçи А.Б.Новикова.
Хальхи вăхăтра та Ю.Савельев КамАЗ автомашинăпа уй-хиртен утă турттарса тăрать. Вăл – шофер-профессионал. Техникăна юсавлă тытать, тикĕс ĕçлеттерет. Вăл хăйĕн пултарулăхĕпе, ĕçченлĕхĕпе малтисен ретĕнче. Ахальтен мар хастар водителе кашни çулах çулталăк вĕçĕнче автомашинăпа чылай тонна километр ĕç тунăшăн райадминистрацин, хуçалăхăн Хисеп грамотисемпе тата премипе чыслаççĕ. «Водитель пулма çуралнă», – теççĕ ун пирки вырăнта пурăнакансем.