12 сентября 2009 г.
Маунтинбайк (сăрт-ту велокросĕ) енĕпе Европăра тата тĕнчере иртекен ăмăртусенче пирĕн ентеш – Раççей спортăн тава тивĕçлĕ мастерĕ Ирина Калентьева – тăван тăрăха темиçе хут та çĕнтерÿпе таврăнчĕ. Пекинри Олимпиадăн бронза призерĕ хальхинче тĕнче чемпионĕн ятне иккĕмĕш хут çĕнсе илчĕ.
Чемпионат Австралири Канберра хулинче иртнĕ. Хĕрарăмсем 32,35 километрлă кросс-кантри ăмăртура тупăшнă. Пилĕк çаврăмра чăваш спортсменки малта пыракан АПШ тата Норвеги велосипедисткисене хыçа хăварать, пьедесталăн пĕрремĕш картлашки çине улăхать. Сăмах май, иртнĕ çулхи Олимпиадăра çĕнтернĕ С.Шпитц (Германи) – тăваттăмĕш.