12 сентября 2009 г.
Иртнĕ юн кун ытти кунсенчен урăхлараххине сисрĕн-и эсĕ, вулакан? Календарьте 2009 çулхи сентябрĕн 9-мĕшĕ, çулталăкри 9-мĕш уйăх пулчĕ. «Виçĕ тăххăр» ÿсĕм-çитĕнÿ кÿни, телей-савăнăç парнелени çинчен калаççĕ. Çавăн пекех вăл çын вăй-хăватне хушма, хаяр вăйсене сирме пулăшать иккен.
«Виçĕ тăххăр» кунĕ Атнар ялĕнче пурăнакан Елена Владимировнапа Юрий Евгеньевич Тибогайкин кил-йышĕнче те паллă пулăмпа палăрса юлнă. Вĕсем хăйсен виççĕмĕш ачине – Антона – районти ЗАГС пайĕнче ят хунине регистрациленĕ. ЗАГС пайĕн ертсе пыракан специалисчĕ Алина Мурайкина та, пĕчĕк пепкен ашшĕ-амăшĕ те çак асамлă виçĕ цифра ачан вăй-хăватне, ăнăçлăхне татса пама пулăшасса шанса тăни пирки пĕлтернĕ.
Сентябрĕн 9-мĕшĕнче районти ЗАГС пайĕнче çĕнĕ çемье çавăрнине те шута илнĕ. Туктамăшри Александр Тинехпейкинпа Канаш тăрăхĕнчи Зарема Кушникова пĕрлешсе упăшкипе арăмĕ пулса тăнă.