12 сентября 2009 г.
ЧР Патшалăх Канашĕ кăçалхи июлĕн 24-мĕшĕнче ачасен сывлăхне, вĕсен психикăпа ăс-тăн, кăмăл-сипет аталанăвне сиен кÿрессинчен сыхлас тĕллевпе саккун йышăннă. Çак саккунпа килĕшÿллĕн, 18 çула çитмен ачасен каçхи 10 сехет хыççăн обществăлла вырăнсенче, çак йышра урамра, стадионта, паркра, скверта, çавăн пекех эрех-сăра сутакан барта, ресторанта тата алкоголь продукцине сутакан ытти çĕрте пулма юрамасть. Право йĕркине сыхлакан органсем çак вырăнсенче çул çитмен ачана тĕл пулсан, тăхтаса тăмасăр ашшĕ-амăшне пĕлтереççĕ. Енчен те ашшĕ-амăшне тупаймасан, ачана çул çитменнисен ятарлă учрежденине çитереççĕ. Саккун требованийĕпе пулма юраман вырăнсенче, объектсенче 18 çул тултарман çамрăка тĕл пулсан граждансен шалти ĕçсен пайне пĕлтермелле.