07 октября 2009 г.
Черемушки поселокĕ Çĕмĕрле районĕпе чикĕленет. Кунта пурĕ 31 çемье шутланать. Темиçе çул каялла кашни килте тенĕ пекех 2-3-шер ача чупнă. Поселокра пурăнакансем вăрман хуçалăхне аталантарас тесе сахал мар тăрăшнă. Хăй вăхăтĕнче поселока асфальт çул хывнă, унтан газ пăрăхĕсем илсе çитернĕ. Пурнăç малалла шуса пынă.
Кунсем, çулсем иртеççĕ. Халĕ кунта пурăнакансенчен чылайăшĕ ватăлса пырать тесен те йăнăш мар. Район центрĕнчен аякра пулнă май пирĕн пирки вырăнти ял тăрăхĕн пуçлăхĕ А.Н.Кузнецов та маннă тесе шутлаттăмăр. Анчах та эпир йăнăшнă иккен. Хăйăр тиенĕ "КамАЗ" сассине илтсен урама тухса тĕлĕнсе кайрăмăр. Асфальт çук урамсене 14 машина таран хăйăр килсе тăктарчĕ вăл. Тепĕр кунне вара Атнар ял тăрăхĕн администрацийĕнче ĕçлекенсем хăйăрне шăтăк-путăксене тултарса якатса хăварчĕç. Кунта пурăнакансемшĕн çакă чăннипех парне пулчĕ.