14 октября 2009 г.
Кăçал выльăх-чĕрлĕх продуктивлăхне ÿстерме майсем çителĕклех. Хуçалăхсем хĕл каçма апат лайăх хатĕрлесе хăварчĕç. Ферма ĕçченĕсем сăвăма ÿстерсех пыраççĕ. Акă, «Свобода» колхозри дояркăсем 9 уйăхра кашни ĕнерен 3881 литр сĕт сунă. Çулталăк вĕçне пилĕк пинрен ирттерме шутлаççĕ. Иртнĕ çул та анатçĕрпÿкассисем сăвăмпа чи малтисем пулнă. В.Никитин фермер хуçалăхĕнче 9 уйăхри сăвăм 3580 литрпа танлашать, атнарсен – 3560 литр, «Победа» – 3395, «Нива» – 3283, туриçĕрпÿкассисем те кăçал сĕт туса илессипе кăтартăва чылай ÿстернĕ. Кунти ĕнесем талăкра 9,6 килограмм сĕт антараççĕ.
Хальхи вăхăтра хуçалăх фермисенчи выльăхсене хĕллехи рациона куçарса пыраççĕ. Сăвăма чакарас мар текенсем ĕнесене сенаж-силос çитересси çине куçрĕç. Тăрăшуллисем кăçалхи çулталăка тăватă тата пилĕк пин литр ытларах сĕт суса илнипе вĕçлеме шутлаççĕ.