22 января 2014 г.
Эрне кун, январĕн 17-мĕшĕнче, РФ Пенси фончĕн Чăваш Республикинчи Управленийĕн управляющийĕ Роза Кондратьева тата массăллă информаци хатĕрĕсен журналисчĕсем хутшăннипе видеоçыхăну мелĕпе пресс-конференци иртнĕ.
Онлайн-трансляци Пенси фончĕн районти Управленийĕнче те пынă. Конференцие управлени начальникĕ Алина Ежеева, пай начальникĕ Татьяна Швецова, начальник çумĕ Марина Ямскова хутшăннă.
Пресс-конференцие РФ Пенси фончĕн Чăваш Республикинчи Управленийĕн управляющийĕ Роза Кондратьева уçнă, вăл граждансене пенси прависен çĕнĕ йĕркипе паллаштарнă. Çавăн пекех обязательнăй пенси страхлавĕн тытăмĕнче пенси хушса тÿлемелле туни пирки пĕлтернĕ. Асăннă çĕнĕлĕхсем 2015 çулхи январĕн 1-мĕшĕнчен вăя кĕрĕç. Саккунсене иртнĕ çулхи декабрь уйăхĕнче алă пуснă. Ĕç пенсийĕ страхлав тата перекетлесе пухни (накопительная) çине пайланĕ. Малтанхи пекех хĕрарăмсем 55 çулта, арçынсем 60 çулта тивĕçлĕ канăва тухĕç. Ĕç стажĕ 15 çул пулмалла. Паянхи кун ĕç стажĕн чи пĕчĕк виçи 5 çул пулсан, 2015 çултан вăл çулсерен (10 çул хушши) çулталăклăха тăсăлĕ. Унсăр пуçне 30 балран (пенси коэффициентĕнчен) тăракан пенси прависене йĕркелемелле пулать. Балл хакĕ укçа-тенкĕне палăртĕ, унăн сумми çулсеренех ÿссе пырĕ.
Çавăн пекех халĕ 1967 çулта тата ун хыççăн çуралнă граждансем пенсин перекетлесе пухнă пайне (накоплени) уйăрса пыма тивĕç. Асăннă категорири ĕçченсен суйлав ирĕкĕ пулĕ. Ăна икĕ çул хушшинче – 2015 çул вĕçлениччен – тумалла: е пур взноссене страхлав пенсийĕ çине ямалла, е вĕсене малтанхи пекех накоплени çине (6 процент) куçармалла.
А.АЛЕКСЕЕВА.