22 января 2014 г.
Йăлана кĕнĕ тăрăх, кăçал та районта оборонăпа массăллă, спорт ĕçĕсен уйăхлăхĕ иртĕ. Вăл январĕн 23-мĕшĕнче пуçланать.
Уйăхлăха шкул ачисене физкультурăпа спорт вăййисене активлăрах явăçтарас, патриотизмла воспитани ĕçне вăйлатас, çитĕнекен ăрăвăн гражданла шухăшне аталантарас тĕллевпе йĕркелеççĕ. Çавна май ачасемпе çамрăксем хутшăннипе тĕрлĕ мероприяти иртĕ, çав шутра – "Раççей йĕлтĕр йĕрĕ-2014" чупу (вăл февралĕн 2-мĕшĕнче Ишеккасси çывăхĕнчи вăрманта пулĕ), пневматикăллă винтовкăпа перессипе район Кубокĕ, В.Быковпа Г.Иванов, Ю.Макаров воин-интернационалистсене халалланă "Чĕррисем асра тытчăр, ăрусем ан манччăр" патриотизмла юрăсен фестивалĕ, шашкăлла тата шахматла выляссипе район турнирĕ. Çавăн пекех районти шкулсенче вĕренекенсем Афганистанран вырăс çарĕсене кăларнăранпа 25 çул çитнине халалланă çарпа патриотизмла юрăсен "Салтак вăрçа суйламасть" конкурсне хутшăнма пултараççĕ.
А.ТИМОФЕЕВА.