22 января 2014 г.
Чăваш Республикин Пуçлăхĕ Михаил Игнатьев январĕн 17-мĕшĕнче пĕчĕк тата вăтам предпринимательлĕх представителĕсемпе тĕл пулнă. Хăйĕн сăмахĕнче Михаил Васильевич çакăн пек тĕл пулусем йăлана кĕрсе пынине пĕлтернĕ. Çавăн пекех вăл Чăваш Ен Правительстви пĕчĕк тата вăтам предпринимательлĕхе пысăк тимлĕх уйăрнине, финанс, пурлăх, йĕркелÿ, кунсультаци, право енĕпе пулăшу парса тăнине палăртнă.
"Юлашки виçĕ çулта кăна пĕчĕк тата вăтам бизнеса тĕрев парас тĕлĕшпе патшалăх 1,1 миллиард тенкĕ уйăрнă", – тенĕ Михаил Игнатьев. Унсăр пуçне вăл юлашки çулсенче бизнес-сообществăпа тĕрĕслекен органсем хушшинчи çивĕчлĕх сирĕлсе пынине, анчах татса памалли ыйтусем пĕтменнине пĕлтернĕ.
Тĕл пулура ЧР экономика аталанăвĕн, промышленность тата суту-илÿ министрĕ Владимир Аврелькин 2013 çулхи ĕç пĕтĕмлетĕвĕпе паллаштарнă, умри задачăсене палăртнă. ЧР Суту-илÿпе промышленность палатин президенчĕ Игорь Кустарин предпринимательсене патшалăх, муниципаллă власть тата тĕрĕслевпе асăрхав органĕсем çумĕнчи обществăлла канашсене активлăрах усă курма чĕнсе каланă.
Предпринимательсем те сăмах илнĕ. Вĕсем хальхи условисенче мĕнле аталанса пыни, мĕнле йывăрлăхсем сиксе тухни пирки каласа панă, нумайăшĕ республикăра инвестици климачĕ лайăх пулнине асăннă.
Тĕл пулура предпринимательсен сообществин представителĕсене наградăсем панă. Вĕсен йышĕнче Хĕрлĕ Чутай райповĕн "Четайское" ТЯО-н генеральнăй директорĕ Юрий Яндайкин та пур. Юрий Осипович Чăваш Республикин промышленноçне аталантарас енĕпе пысăк тÿпе хывнăшăн тата ĕçри çитĕнÿсемшĕн ЧР Пуçлăхĕн Тав çырăвне тивĕçнĕ.
Юрий Яндайкин – пултаруллă, пысăк опытлă ертÿçĕ. Хуть те хăш отрасльте те вăл тăрăшулăхĕпе палăрнă. 2004 çулта ял хуçалăхĕнчи çитĕнÿсемшĕн "ЧР тава тивĕçлĕ ял хуçалăх ĕçченĕ" хисеплĕ ята тивĕçнĕ. Чылай çул ĕнтĕ вăл райпо тытăмне кĕрекен "Четайское" ТЯО-на ăнăçлă ертсе пырать.
А.ДМИТРИЕВА.