10 февраля 2014 г.
Чăваш Енре пурăнакансенчен ытларахăшĕ (90 процента яхăн) Интернета чи малтанах юлашки хыпарсемпе паллашма кĕрет. Çакăн пек кăтартусем парать Чăваш патшалăх гуманитари ăслăлăхĕсен институчĕ социологи тĕпчевĕн пĕтĕмлетĕвĕсем тăрăх. Федерацин информагентствисем информацин тĕп çăл куçĕ пулса тăраççĕ, вĕсене респондентсен 46,1 проценчĕ вулать. Республикăн власть органĕсен официаллă порталĕ регионти информаци ресурсĕсем хушшинче чи сумли пулни палăрать. Ыйтăма хутшăннисен 51,3 проценчĕ шăпах унпа усă курать.
Иккĕмĕш вырăнта – сетьре тĕрлĕ информацие шырани. Хăйсене кăсăклантаракан ыйтусен хуравне Интернетра ыйтса пĕлнисен 84,8 проценчĕ шырать. Виççĕмĕш вырăнта – электрон почтăпа ĕçлени (75,9 процент). Çак хуравсем çамрăксен те, аслă ăрăвăн та тĕл пулаççĕ. Кунсăр пуçне ыйтăма хутшăннисен 68,9 проценчĕ Интернет уçлăхĕнче фильмсемпе музыка шырать, 56,1 проценчĕ – фотопа видео вырнаçтарать, 46,3 – программа уçлаççĕ, 34,9 – ĕç шыраççĕ.
Çÿлерех асăннисемсĕр пуçне 18-24 çулхи çамрăксем хушшинче Интернет-вăйăсем вылясси (55,6 процент) анлă сарăлнă. Патшалăх электрон пулăшăвĕпе 25,8 респондент усă курма ĕлкĕрнĕ, вĕсем ытларах 25-34 çулхисем.
Тĕпчеве пĕлтĕрхи август-сентябрь уйăхĕсенче ирттернĕ. Шупашкар, Çĕнĕ Шупашкар, Улатăр, Канаш, Куславкка, Çĕрпÿ, Çĕмĕрле, Етĕрне хулисенчи тата Улатăр, Патăрьел, Вăрнар, Йĕпреç, Куславкка, Хĕрлĕ Чутай, Шупашкар, Çĕмĕрле, Етĕрне районĕсенчи пурĕ 620 çынран ыйтса пĕлнĕ. Респондентсене хуравсен темиçе вариантне суйласа илме ирĕк панă.
Н.ПЕТРОВА.