10 февраля 2014 г.
Раççей тĕп прокурорĕн Ю.Я.Чайкăн 2014 çулхи январĕн 20-мĕшĕнчи хушăвĕпе килĕшÿллĕн район прокурорĕ пулса юстицин аслă советникĕ Валерий Вениаминович Шоркин ĕçлеме пуçларĕ. Унччен вăл Элĕк районĕн прокурорĕнче 2007 çултан пуçласах ĕçленĕ.
Валерий Вениаминович Куславкка районĕнчи Куснар ялĕнче 1961 çулхи ноябрь уйăхĕнче çуралнă. Ялти вăтам шкула пĕтернĕ хыççăн ĕç биографине 1979 çулта çак районти "Аниш" совхозăн трактор паркĕнче слесарьте тимленинчен пуçланă. Çар тивĕçне Хабаровск крайĕнче 1980-1982 çулсенче пограничниксен çарĕнче застава старшини пулса пурнăçланă. Хусанти патшалăх университетĕнче юрист специальноçне 1987 çулта илнĕ. Вĕренсе тухнă хыççăн тĕрлĕ тивĕçсене пурнăçланă. 1987-1990 çулсенче Патăрьел районĕнче прокуратура следователĕ, 1990-1993 çулсенче Шупашкар хулин Мускав районĕнче прокуратурăн аслă следователĕ тата 1993-1998 çулсенче район сучĕн судйи пулнă. 1998-2000 çулсенче Шупашкарти Мускав районĕн Адвокатсен коллегийĕнче адвокат тивĕçĕсене пурнăçланă. Чăваш Республикин Прокуратуринче тĕрлĕ должноçсенче 2000 çултан пуçласах ĕçленĕ.
Авланнă, мăшăрĕпе икĕ ачана ура çине тăратнă. Аслă ывăлĕ Етĕрнери прокуратурăра тимлет, кĕçĕнни – хĕр, Саратоври юридици академийĕнче ăс пухать.
Г.Николаева.