12 февраля 2014 г.
Сочири Олимп вăййисем уçăлнине халалласа февралĕн 8-мĕшĕнче Ачкасси ял тăрăхĕн территорийĕнче пĕрремĕш хут М.И.Замуткин ячĕпе хисепленекен аллейăра йĕлтĕрçĕсен ăмăртăвĕ иртрĕ.
Тĕрлĕ ял тăрăхĕсенчен килсе çитнĕ спортсменсене район администрацийĕн пуçлăхĕ Александр Башкиров Сочири Олимп вăййисем уçăлнă ятпа саламларĕ, ку пулăмран хĕрлĕчутайсем те аякра тăрса юлманнине, ăна чылай спорт мероприятине халалланине пĕлтерчĕ, Ачкасси ял тăрăхĕнче асăннă ăмăртăва йĕркелекенсене тав турĕ. Ачкасси ял тăрăхĕн пуçлăхĕ Игорь Герасимов çакăн пек мероприятисем ирттерессине малашне йăлана кĕртсе пырасси пирки каларĕ, халăха физкультурăпа спорт ăмăртăвĕсене явăçтарасси пĕлтерĕшлĕ ĕçсенчен пĕри пулнине палăртрĕ, спортсменсене ăнăçу сунчĕ.
Район спортсменĕсем ăмăртура хастар тупăшрĕç. Арçынсемпе хĕрарăмсем, каччăсемпе хĕрсем, шкул ачисем хушшинчи ăмăрту питĕ хĕрÿ иртрĕ.
Çамрăк йĕлтĕрçĕсем хушшинче Хĕрлĕ Чутай шкулĕнче кĕçĕн класра вĕренекен Владимир Кондратьев, Серенкассинчи пуçламăш шкул - ача садĕнче вĕренекен Анастасия Ямброськина финиша пĕрремĕш çитрĕç. Çак ача садне çÿрекен Максим Матвеев «Чи çамрăк йĕлтĕрçĕ» ята тивĕçрĕ.
15 çула çитмен шкул ачисем хушшинче Шулю шкулĕнче вĕренекенсем – Юрий Окайкин, Дмитрий Мерзлайкин, Константин Солдаткин – палăрчĕç (вĕрентекенĕ Юрий Гурьянов).
20-29 çулхи спортсменсем хушшинче: 1-мĕш – Туктамăшри Иван Черендеев, 2-мĕш – Хĕрлĕ Чутайри Игорь Андрианов, 3-мĕш – Андрей тата Михаил Замуткинсем, Иван Казаков тухрĕç (Ачкасси ял тăрăхĕ).
30-39 çулхи хĕрарăмсем хушшинче: 1-мĕш – Валентина Кондратьева (райадминистраци), 2-мĕш – Оксана Матвеева, 3-мĕш – Надежда Мидушкина (Ачкасси ял тăрăхĕ).
40-49 çулхи хĕрарăмсем хушшинче: 1-мĕш – Алевтина Дадюкова (райадминистраци), 2-мĕш – Валентина Кондакова (райбольница).
40-49 çулхи арçынсем хушшинче: 1-мĕш – Вячеслав Дадюков ("Хастар" ФСК), 2-мĕш – Юрий Андрианов (районти полици уйрăмĕ), 3-мĕш – Александр Ямброськин тата Николай Мидушкин (Ачкасси ял тăрăхĕ).
50-59 çулхи арçынсем хушшинче: 1-мĕш – Владимир Элеменкин ("Хастар" ФСК), 2-мĕш – Виталий Музяков (Пантьăк ял тăрăхĕ), 3-мĕш – Николай Пономарев (Ачкасси ял тăрăхĕ). Çак ушкăнрах хĕрарăмсенчен Ачкассинчи Людмила Зверева чи вăйли пулчĕ.
60 çултан аслăраххисем хушшинче Людмила Михуткина ("Хастар" ФСК) тата Валентин Харитонов (Хусанушкăнь ял тăрăхĕ) палăрчĕç.
Çĕнтерÿçĕсем пурте грамотăсене, медальсене тата парнесене тивĕçрĕç. Йĕлтĕрçĕсен ăмăртăвĕ чăн-чăн хĕллехи уява аса илтерчĕ: савăнăçлă кĕвĕ, савăк кăмăл, Олимп факелĕ, хĕрÿ ăмăрту, парнесем, шашлăк шăрши, "Сочи-2014" торт, асăнмалăх сăн ÿкерĕнни – спорт уявне йĕркелекенсем çак самантсем пĕтĕмпех асра юлччăр тесе тăрăшнă.
А.ДМИТРИЕВА.