12 февраля 2014 г.
Февралĕн 15-мĕшĕнче Раççейре воин-интернационалистсене сума суса Асăну кунĕ иртĕ. 1989 çулта Совет Çарĕсене Афганистанран илсе тухнăранпа 25 çул çитнĕ ятпа паллă тăваççĕ ăна.
Çак кун районта та тĕрлĕ мероприяти ирттерме палăртнă: малтанах Афган тата Чечен вăрçисене хутшăннисемпе тĕл пулу иртĕ, унтан воин-интернационалистсене асăнса лартнă палăк умне чечек кăшăлĕсем хурĕç.
13 сехет те 30 минутра вара районти Культурăпа кану центрĕнче Афганистанпа Чечен çĕрĕсем çинче пуçĕсене хунă ентешсене Юрий Макарова, Валериан Быкова, Геннадий Иванова, Сергей Эзенкина асăнса йăлана кĕнĕ "Чĕррисем асра тытчăр, ăрусем ан манччăр" патриотизмла юрăсен фестивалĕ пулать. Ăна райадминистрацин культурăпа спорт, архив ĕçĕн пайĕ, вĕренÿ пайĕ тата "Афганистан ветеранĕсен Раççейри Пĕрлешĕвĕ" обществăлла организацин районти уйрăмĕ йĕркелесе ирттереççĕ.
Фестивале 8-22 çулхи ачасемпе çамрăксем, çав шутра шкулсенче, техникумсемпе аслă вĕренÿ заведенийĕсенче вĕренекенсем, ĕçлекен яшсемпе хĕрсем хутшăнĕç. Тăххăрмĕш хут иртекен фестивальте Тăван çĕр-шыв, çар, юлташлăх, вăрçă çулĕсем çинчен çырнă юрăсем янăрĕç.
А.КАРПОВА.