12 февраля 2014 г.
Сумлă юбилейсемпе районти ватăсене РФ Президенчĕн Владимир Путинăн Çырăвĕпе саламлас ырă йăла малалла пурнăçланать. Акă, февралĕн 7-мĕшĕнче черетлĕ саламлă Çыру Хĕрлĕ Чутай салинчи Ольга Мохнатова ячĕпе килнĕ. Ольга Ильиничнăна Президентăн Çырăвне район администрацийĕн пуçлăхĕ Александр Башкиров вуласа панă. Александр Викторович кинемее нумай çул хушши сывлăх сыхлавĕнче тăрăшса ĕçленĕшĕн тав тунă, çирĕп сывлăх суннă. Хĕрлĕ Чутай ял тăрăхĕн пуçлăхĕ Леонид Аргандейкин тата социаллă хÿтлĕх пайĕн начальникĕ Вера Ярабаева та ăна ăшшăн саламланă, асăнмалăх парне панă.
Ольга Ильинична 39 çул райбольницăн ача çуратмалли уйрăмĕнче санитаркăра вăй хунă, тÿрĕ кăмăлпа ĕçленĕшĕн нумай-нумай тав çырăвне тивĕçнĕ. Мăшăрĕпе, Аслă Отечественнăй вăрçă участникĕпе, ывăлне пурнăç çулĕ çине кăларнă. Паян хисеплĕ ватăсен ултă мăнук тата икĕ кĕçĕн мăнук.
Ольга Ильиничнăна юбилей ячĕпе инвалидсен обществи çумĕнчи "Шанчăк" фольклор ушкăнĕ юрăпа саламланă.
А.ДМИТРИЕВА.