12 февраля 2014 г.
Тихăнушкăнчи Волковсене пĕлмен çын çук пулĕ. Пултаруллă йăх районта уйрăмах çут çанталăка упрассипе, спортпа çыхăннă пуçаруллă ĕçсемпе паллă. Çак кунсенче редакцине Порфирий Кириллович Волков шăнкăравларĕ, мăнукĕ Ирина февралĕн 1-мĕшĕнче Сочие тухса кайнине, унта волонтерта ĕçленине пĕлтерчĕ. Ку хыпаршăн эпир савăнтăмăр, çакна вулакансене те пĕлтерес терĕмĕр.
Ирина Волкова – Олимп вăййисене республикăран кайнă 176 волонтертан пĕри, И.Я.Яковлев ячĕллĕ чăваш патшалăх педагогика университечĕн ют чĕлхесен факультечĕн студентки. Хальхи вăхăтра Ирина конькипе чупакансен тата фигуристсен "Айсберг" керменĕнче протоколсем хатĕрлекен пайра вăй хурать, пысăк çынсемпе, vip-клиентсемпе ĕçлет. Çак пысăк мероприятире алă усса ларма çуккине, ĕç вăхăчĕ çирĕп пулнине хĕр малтанах пĕлнĕ. Çакă ăна пачах та шиклентермен. Уншăн чи пĕлтерĕшли – спорт уявĕн пĕр пайĕ пулни. Çакна палăртмалла: Ирина Волкова кун пек ĕçе пĕрремĕш хут хутшăнмасть. Пике Хусанта иртнĕ Пĕтĕм тĕнче Универсиадинче пысăк опыт пухнă, медицина центрĕн ĕçченĕсемпе, спортсменсемпе акăлчан, испани чĕлхисене куçарас енĕпе ĕçленĕ. Тутарстанран хавхаланса килнĕскерĕн тинех тĕнчери чи паллă спортсменсене, уйрăмах Евгений Плющенкăна курас ĕмĕт пурнăçланнă.
Порфирий Кириллович пĕлтернĕ тăрăх, Иринăна халĕ питĕ яваплă ĕç шанса панă, çапах та куçаруçăра ĕçленĕ хушăрах вăл хăйĕн сăн ÿкерчĕкĕсене тăванĕсене ярса пама та вăхăт тупать.
А.ЗАМУТКИНА.