17 февраля 2014 г.
Кив Атикасси ял тăрăхне кĕрекен Яманкасси ялĕнче пурăнакан Раиса Андреевна Герасимова февралĕн 12-мĕшĕнче 90 çул тултарнă. Çавна май вăл РФ Президенчĕн саламлă Çырăвне илнĕ, çавăн пекех районти, вырăнти хăй тытăмлăх органĕсен, социаллă хÿтлĕх пайĕн ертÿçисенчен юбилей саламне йышăннă. Пысăк хăнасенчен тав сăмахĕсене илтсен савăнăçлă хумханăвне вăл ниепле те пытарайман.
Ĕмĕрĕпех тăван хуçалăхра ĕçлесе пурăннă чăваш хĕрарăмĕ ултă ача çуратса ÿстернĕ. Шел пулин те, виççĕшин ĕмĕрĕ кĕске пулнă. Ĕç ветеранĕ çак паллă куна тепĕр виçĕ ачипе, мăнукĕсемпе кĕтсе илнĕ. Килĕнче пĕчченех пурăнать вăл, ĕçсĕр ларма хăнăхманскер хуçалăхри вак-тĕвек ĕçсене хăех пурнăçлать. Çак ялтах инçех мар хĕрĕ çемйипе пурăнни унăн кăмăлне çĕклет, шанчăк парать. Амăшĕ патне хĕрĕ кулленех килсе çÿрет. Мăнукĕсем те ваттăн чунне йăпатаççĕ, май пур таран пулăшма тăрăшаççĕ.
А.ДМИТРИЕВА.