19 февраля 2014 г.
Аслă Отечественнăй вăрçа хутшăннисене, вăрçă вăхăтĕнче тылра ĕçленисене 90 çулхи тата ун хыççăнхи юбилейĕсем ячĕпе Раççей Президенчĕ ячĕпе саламласси малалла пырать.
90 çул тултарнă ятпа
Çак кунсенче Хурапыр ялĕнче пурăнакан Анастасия Горланова ячĕпе те Мускаври Кремльтен саламлă Çыру çитнĕ, ăна ватă патне район администрацийĕн пуçлăхĕ Александр Башкиров, Питĕркасси ял тăрăхĕн пуçлăхĕ Лилия Гаврилова, социаллă хÿтлĕх пайĕн начальникĕ Вера Ярабаева çитернĕ, кинемее 90 çул тултарнă ятпа саламланă, 100 çулхи юбилее кĕтсе илме ырлăх-сывлăх суннă, асăнмалăх парне панă.
Вăрăм ĕмĕр вăрттăнлăхĕ – тараватлăх
Арайкассинче пурăнакан Елена Ильинична Роскова та Раççей Президентĕнчен Владимир Путинран саламлă Çыру илнĕ, ăна кинемее район администрацийĕн пуçлăхĕ Александр Башкиров, Штанаш ял тăрăхĕн пуçлăхĕСветлана Ефремова, социаллă хÿтлĕх пайĕн начальникĕ Вера Ярабаева çитернĕ, ватăна сумлă юбилей ячĕпе саламланă.
Менелник хуçи çулсене пăхмасăр кашни кунпа савăнса пурăнать, шÿтлеме юратать, тараватлăх вăрăм ĕмĕрĕн эликсирĕ пулнине палăртать. Ватлăх çулĕсене мăшăрсăр ирттерет пулин те ачисемпе мăнукĕсем, çывăх юлташĕ Александра Ильинична Алексеева (вăл кăçал июлĕн 19-мĕшĕнче 95 çул тултарать) ун пирки манмаççĕ.
Вăрçă çулĕсем асрах
Калкасси ялĕнче пурăнакан Анна Максимовна Ярадаева та хăйĕн 95 çулхи юбилейне кĕтсе илнĕ, саламлă Çырăва тивĕçнĕ. Район администрацийĕн тата Ачкасси ял тăрăхĕн пуçлăхĕсем ватăна Президент Çырăвĕпе паллаштарнă май, сывлăх суннă.
Анна Максимовна 13 çул утаймасть ĕнтĕ. Вăл хăйĕн хĕресне хĕрĕн çемйинче кирлĕ пулăшу илсе пурăнать.
А.АЛЕКСЕЕВА.