19 февраля 2014 г.
Йăлана кĕнĕ тăрăх февралĕн 15-мĕшĕнче воин-интернационалистсем район администрацине çавра сĕтеле пухăнчĕç. Унта район администрацийĕн пуçлăхĕ Александр Башкиров, культурăпа спорт тата архив ĕçĕн пайĕн начальникĕ Александр Самсонов, Етĕрне тата Хĕрлĕ Чутай районĕсен çар комиссариачĕн представителĕ Владимир Мареев, Афганистанра пулнă воин-интернационалистсен районти уйрăмĕн ертÿçи Александр Хозайкин тата социаллă служба представителĕсем хутшăнчĕç.
Александр Викторович воин-интернационалистсене çĕр-шыв умĕнчи тивĕçе паттăррăн пурнăçланăшăн тав турĕ, паянхи пурнăçра çамрăк ăрăва патриотизмла воспитани парас обществăлла ĕçре палăрнăшăн "Раççейри ветерансен Канашĕ" Пĕтĕм Раççейри обществăлла организацин республикăри уйрăмĕн членĕсене Михаил Мареева, Николай Смирнова, Владимир Хохлова, Геннадий Никитина, Юрий Егорова, Геннадий Селиванова, Юрий Матвеева Тав çырăвĕсем пачĕ. Çавăн пекех Сергей Гусельщикова "Афганистан ветеранĕсен Раççейри Канашĕн" Хисеп грамотипе, Александр Хорайкинпа Александр Хозайкина Тав çырăвĕсемпе, Иван Сатлайкина "Афганистанра çапăçусем вĕçленнĕренпе 25 çул çитнине асăнса" юбилей медалĕпе наградăларĕ. Çавра сĕтеле пухăннисем тĕл пулăва йĕркелекенсене тав турĕç. Çĕнтерÿ лапамĕнчи Чул палăк умне чечек кăшăлĕ хучĕç, унтан Культурăпа кану центрне патриотизмла юрăсен фестивальне курма васкарĕç.
"Чĕррисем асра тытчăр, ăрусем ан манччăр" фестиваль кăçалхипе тăххăрмĕш хут иртрĕ. Фестивале 8-12, 13-15, 16-22 çулхисем – пĕтĕмпе 40-е яхăн çамрăк – хутшăнчĕç. Вăл районти пултаруллă юрăçсене пухрĕ, кашниех тăван Раççей, çĕр-шыв, юлташлăх, вăрçă çулĕсенчи юрăсене шăрантарчĕ. Жюрин ăста юрăçсенчен чи лайххисене суйлама тиврĕ.
Кĕçĕн ушкăнра пĕрремĕш вырăна Мария Аливанкина (ертÿçи Валентина Грачева) тухрĕ, иккĕмĕш вырăна Дарья Волковапа (ертÿçи Валерий Ярабаев) Анна Сатлайкина (ертÿçи Татьяна Зарубина) пайларĕç, виççĕмĕш вырăна Анастасия Мареева (ертÿçи Венера Молодейкина) тата Екатерина Тверскова (ертÿçи Людмила Кирюшина) йышăнчĕç.
Вăтам ушкăнра Татьяна Мурайкина чи пултарулли пулчĕ (ертÿçи Венера Молодейкина). Иккĕмĕш вырăна Лиана Аргандейкинапа (ертÿçи Лариса Краснова) Анна Сармандейкина (ертÿçи Валентина Грачева) тухрĕç, виççĕмĕш вырăнта – Дарья Петрова (ертÿçи Валерий Ярабаев) тата Татьяна Ефремова (ертÿçи Надежда Егорова).
Аслисен ушкăнĕнче Екатерина Мурайкина (ертÿçи Венера Молодейкина) çĕнтерчĕ, иккĕмĕш вырăнта – Татьяна Граченова (ертÿçи Валерий Ярабаев). Палăрнисем пурте фестивалĕн ятарлă Дипломĕсене тата хаклă парнесене тивĕçрĕç.
А.ДМИТРИЕВА.