24 февраля 2014 г.
Февралĕн 19-мĕшĕнче республикăра, çав шутра пирĕн районта та, Пĕрлехи информаци кунĕ иртрĕ. Шупашкартан килсе çитнĕ информаци ушкăнне Чăваш Республикин пурлăхпа çĕр хутшăнăвĕсен министрĕ Светлана Енилина ертсе пычĕ.
Хăнасем ушкăнсем çине пайланса ял тăрăхĕсене çитрĕç, ĕç коллективĕсемпе тĕл пулчĕç. Светлана Енилинапа район администрацийĕн пуçлăхĕ Александр Башкиров ертсе пыракан ушкăн Атнар ял тăрăхĕнче тата "Коминтерн" хуçалăхра пулнă (кун пирки тĕплĕнрех – çитес номерте).
Чăваш Республикин культура министрĕн пĕрремĕш çумĕ Альбина Алексеева, район пуçлăхĕ Александр Степанов, ЧР Патшалăх Канашĕн депутачĕ Валерий Павлов, Пенси фончĕн районти уйрăмĕн специалисчĕ Марина Ямскова Пантьăк ял тăрăхĕнчи Мишеркасси шкулĕнче ку тăрăхра пурăнакансемпе тĕл пулчĕç, Пĕрлехи информаци кунĕн темисене тишкерчĕç.
Альбина Алексеева РФ Президенчĕн "Раççей Федерацийĕнче Культура çулталăкне ирттересси" Указне пурнăçласси, Чăваш Енĕн социаллă пурнăçĕпе экономика аталанăвĕн малтанхи пĕтĕмлетĕвĕсем тата республикăн 2013 çулхи бюджет пурнăçлавĕ çинчен, Республика Пуçлăхĕ Михаил Игнатьев Чăваш Патшалăх Канашне янă Çырăвне пурнăçлас енĕпе влаçăн ĕç тăвакан органĕсен 2014 çул валли комплекслă планĕ пирки тĕплĕн ăнлантарса пачĕ.
Культура çулталăкĕ пирки сăмах пуçарнă май Альбина Ивановна культура тени чи малтанах пирĕнтен хамăртан пуçланни пирки каларĕ. Унпа пĕрлех республикăра кăçал тĕрлĕ шайри культура мероприятийĕсем пулассине пĕлтерчĕ, районта пурăнакансене те унта хутшăнма чĕнчĕ.
Сăмах май, республикăри муниципалитетсенче вăй хуракан культура ĕçченĕсен уйăхри вăтам шалăвĕ пĕлтĕр 9900 ытла тенкĕпе танлашнă, пирĕн районта вара ку кăтарту – 10840 тенкĕ. Культура ĕçченĕсен шалăвĕ малалла та ÿсĕ.
2014 çулта республикăра чылай çĕрте культура объекчĕсене юсаса çĕнетĕç, пирĕн районта Питĕркассинчи Культура çуртĕнче юсав ĕçĕсене вĕçлеме палăртаççĕ.
Çавăн пекех Альбина Ивановна çамрăксене Шупашкарти Культура институтĕнче вĕренсе алла професси илме чĕнсе каларĕ, кунта вĕреннĕшĕн укçа тÿлемелле мар.
Республика Пуçлăхĕн Михаил Игнатьевăн Чăваш Патшалăх Канашне янă Çырăвне пурнăçлас енĕпе влаçăн ĕç тăвакан органĕсем 2014 çул валли комплекслă план хатĕрленĕ, вăл виçĕ пайран тăрать. Пĕрремĕшне халăхăн пурнăç условийĕсене лайăхлатассипе, çемье институтне çирĕплетессипе, демографи лару-тăрăвне лайăхлатассипе, физкультурăпа спорта аталантарассипе, çамрăксене патриотизмла воспитани парассипе çыхăннă ыйтусем кĕреççĕ; иккĕмĕшне – экономикăн инвестици илĕртÿлĕхне ÿстересси, инноваци технологийĕсене тăвасси, пысăк квалификациллĕ рабочисене хатĕрлесси; виççĕмĕшне – бюджет политикине лайăхлатасси, патшалăх тата муниципаллă пурлăхпа тухăçлă усă курасси, влаçпа общество хутшăнăвĕсене çирĕплетесси. Асăннă планра пурнăçа лайăхлатма пулăшакан 76 мероприятие пăхса хунă.
Пушар хăрушсăрлăхĕпе тивĕçтересси тата чрезвычайлă лару-тăрăва сиресси пирки каланă май Альбина Алексеева пирĕн районта кăçал вут-çулăмра çынсем вилесси ÿснине пĕлтерчĕ, профилактика ĕçĕсене ирттерсех тăраççĕ пулин те кăтартусем япăх пулнине асăнчĕ, пушар хăрушсăрлăх правилисене тăтăшах пăхăнса тăмаллине асăрхаттарчĕ.
ЧР Патшалăх Канашĕн депутачĕ Валерий Павлов "Единая Россия" политика партийĕн ĕçĕ-хĕлĕпе паллаштарнă май республикăра, çав шутра пирĕн районта та ача сачĕсем тăвасси çинчен, Сочире иртекен хĕллехи Олимп вăййисем тата ачасене спорта явăçтарасси, физкультурăпа спорт комплексĕн ĕçĕ пирки каларĕ. Республикăра спорта аталантарассипе тивĕçлĕ шайра ĕçлесе пынă май кăçал Шупашкарта Халăхсем хушшинчи спорт форумне ирттересси, унăн ĕçне Владимир Путин Президент хутшăнасси пирки палăртрĕ.
Район пуçлăхĕ Александр Степанов пухăннисене районта çурхи акана мĕнле хатĕрленнипе паллаштарчĕ, ку енĕпе ĕçсене пурĕ 4089 гектар çинче пурнăçламаллине палăртрĕ. Çурхи ака ĕçĕсене тивĕçлĕн пурнăçлама 1132 тонна вăрлăх кирлĕ, паянхи куна 74 процентне хатĕрленĕ.
Пенси фончĕн районти уйрăмĕн специалисчĕ Марина Ямскова пухăннисене пенси тытăмĕнчи улшăнусемпе тата çĕнĕлĕхсемпе паллаштарчĕ, ыйтусем çине тĕплĕн хуравларĕ.
Юлашкинчен информаци ушкăнĕсем райадминистрацинче пухăнса пĕтĕмлетÿ турĕç.
А.КАРПОВА.