24 февраля 2014 г.
Йăлана кĕнĕ йĕркепе февраль уйăхĕнче Атнарти вăтам шкултан вĕренсе тухнă çамрăксемпе тĕл пулу иртрĕ. Çак шкулпа 2013 çулта Чăваш Республикин вĕренÿ ĕçĕн отличникĕ А.П.Лаврентьева ертсе пынă класри 15 хĕрпе каччă сыв пуллашнă.
Çамрăксем патшалăх экзаменĕсене ăнăçлă тытса Раççейри тĕрлĕ хуласенче ăс пухма тытăннă. Вĕсем суйласа илнĕ хуласем: Шупашкар, Саратов, Чĕмпĕр. Чăваш патшалăх университетне улттăн, кооператив институтне, Санкт-Петербургри политехника институчĕн филиалне, Чĕмпĕрти гражданла авиаци, çавăн пекех ку хулари техника университетне, Саратоври Дзержинский ячĕпе хисепленекен çар институтне пĕрер çамрăк, ыттисем Шупашкарти медицина, электромеханика колледжĕсене, професси училищисене вĕренме кĕнĕ. Кăтартусем тăрăх çакăн пек пĕтĕмлетÿ тума пулать: вĕренекенсен 37,5 проценчĕ физикăпа математика, 12 проценчĕ – гуманитари, 12,5 – экономика, 6,25 проценчĕ медицина енĕпе вĕренме кайнă, 6,25 проценчĕ йăла ыйтăвĕсемпе тивĕçтерекен специальноçе, 18,5 проценчĕ професси илмелли курссене суйласа илнĕ.
Шкул директорĕн вĕренÿпе воспитани енĕпе ĕçлекен çумĕ Г.Д.Тимофеева ертсе пынипе шкул ачисем концерт лартса, шкул пурнăçĕпе паллаштаракан видео хатĕрлесе, тĕрлĕ конкурссем ирттерсе савăнтарчĕç, кăсăклă ыйтусем парса самаях шутлаттарчĕç. Шкул директорĕ С.И.Кудряшов çамрăксене ăнăçупа телей сунчĕ. Кĕçĕн классенче вĕрентнĕ Л.Е.Яковлева педагог студент чухнехи интереслĕ самантсене аса илчĕ, пурнăçра тÿрĕ çулпа утмаллине, çын япалине тĕкĕнмелле маррине асăрхаттарчĕ. Класс ертÿçи пулнă А.П.Лаврентьева шкул патне выртакан сукмака, тăван класа манас çуккине палăртрĕ.
Яшсемпе хĕрсем шкулпа сыв пуллашнă май хăйсен юратнă учителĕсене тав сăмахĕсем каларĕç. Ырă сăмахсем каласа ĕлкĕрейменнисем вара хăйсен шухăш-туйăмне, сĕнÿсене хут çине çырса хăварма пултарчĕç.
Çак тĕл пулу студентсен, учительсен тата шкул ачисен кăмăлне кайрĕ. Малалла та çак йăлана пăхăнса тăван шкулта кун евĕр тĕл пулусем иртессе шанас килет.
Н.КУРОПАТКИНА, И.Н.Ульянов ячĕпе хисепленекен Чăваш патшалăх университечĕн студенчĕ.