16 апреля 2014 г.
2014 çулхи пĕрремĕш кварталта районти полици уйрăмĕнче тăрăшакансем яланхи пекех оперативлă лару-тăрăва куçран вĕçертмерĕç, граждансен ирĕкĕпе прависене хỹтĕлессишĕн, обществăри хăрушсăрлăхпа тивĕçтерессишĕн тимлерĕç, преступлени тăвакансене тытса чарчĕç, профилактика ĕçĕсем ирттерчĕç. Отчетлă тапхăрта район территорийĕнче 46 преступлени (пĕлтĕр ку вăхăтра - 64 пулнă) регистрацилерĕмĕр. Вĕсенчен 67,4 проценчĕ йывăрах мар преступленисем, вăтам йывăррисем - 15,2 процент, йывăррисем - 13 процент. Питĕ йывăр преступленисен шучĕ вара палăрмаллах ỹсрĕ. Шухăшласа çынна вĕлернĕ тĕслĕх Питĕркассинче пулчĕ - мартăн 3-мĕшĕнче мăшăрĕ хăйĕн арăмне хĕненĕ те çĕçĕпе чикнĕ. Иртнĕ çулхи çак тапхăрта кун пек преступлени пулманччĕ. Вăрă-хурахла ĕçсен хисепĕ чакрĕ, пĕлтĕр 17 пулнă-тăк, кăçал 7 кăна. Асаплантарнă тĕслĕхсем те сахалланчĕç (4-ран 1-не çитнĕ). Пĕтĕмпе кăçалхи январь-март уйăхĕсенче 34 преступление уçса патăмăр, тишкертĕмĕр, суда ярса патăмăр. Профилактика ĕçĕ-хĕлĕ 2011-2020 çулсем валли пăхса хунă районти тĕллевлĕ программăпа килĕшỹллĕн профилактика мероприятийĕсем ирттертĕмĕр. Ку енĕпе вырăнти хăй тытăмлăх органĕсемпе тачă çыхăнса ĕçлерĕмĕр. Ял тăрăхĕсенче профилактика Канашĕсем, халăх дружинисем ĕçлеççĕ. Виçĕ уйăх хушшинче полици сотрудникĕсем тăтăшах тĕрлĕ рейдсенче пулчĕç, ялти Культура çурчĕсене, организацисемпе учрежденисене тĕрĕслерĕç. Профилактика учетĕнче тăракансене те куçран вĕçертместпĕр. Профилактика мерисене пурнăçлани преступленисен шутне чакарма май пачĕ: ĕçсĕррисем йĕркене пăсни 37,8 процент пĕчĕкленчĕ, ушкăнпа преступлени тăвасси - 75 процент, ỹсĕррисем - 19 процент, маларах саккуна пăснисем преступлени туни 40,7 процент сахалланчĕ. Телее, çул çитмен çамрăксем преступлени тунине регистрацилемен. Обществăлла вырăнсенчи лару-тăру Обществăлла вырăнта кăçал та, пĕлтĕрхи пекех, 4 преступлени тунă, вĕсенчен иккĕшне - урамра. Обществăлла вырăнсенче ытларах вăрлаççĕ, çаратаççĕ. Район территорийĕнче "Хăрушсăр хула" комплекс тытăмне ĕçе кĕртесси планпа килĕшỹллĕн пулса пырать. Халăха лăпкăлăхпа тата хăрушсăрлăхпа тивĕçтерме 9 видеокамера вырнаçтарнă, вĕсене полицин дежурнăй чаçĕнчи мониторĕ çинче сăнама май пур. Кунсăр пуçне полици уйрăмĕнче çуртăн шалтине тата территори йĕри-таврарине курма май паракан видеосăнав та ĕçлет. Çул-йĕр хăрушсăрлăхĕ пирки Кăçалхи виçĕ уйăхра çул çинче пулнă инкексен шучĕ икĕ хут чакни палăрать. 2013 çулхи çак тапхăрта 4 çул-йĕр инкекĕ пулнă пулсан, кăçал - иккĕ. Аманнисен шучĕ те малтанхинчен 6-ран 2 таран чакнă. Иртнĕ çулхи январь-март уйăхĕсенче çул-йĕр инкекĕсенче 4 çын пурнăçĕ татăлнă, кăçал вилекенсем пулманни савăнтарать. Аварисем ытларах ỹсĕр водительсен айăпĕпе пулнă. Районта кун евĕр икĕ аварие шута илтĕмĕр. Çавăн пекех çул-йĕр инкекĕсем руль умĕнче ларакансем хăвăртлăха кирлинчен ытла ỹстернипе, транспорт хатĕрне машинăсем çỹремелли вырăнта правилăна пăсса лартса хăварнипе те пулнă. Çул-йĕр хăрушсăрлăх правилисене пăснăшăн районта 457 çынна административлă явап тыттартăмăр, вĕсенчен: ỹсĕрле руль умне ларнăшăн - 20 çынна, хăвăртлăха ỹстернĕшĕн - 97. Пĕтĕмпе 295900 тенкĕлĕх штраф хунă, 27200 тенкине шыраса илнĕ. Преступленисене уçса парасси Январь-март уйăхĕсенче преступленисене уçса парасси 2,8 процент чакни сисĕнет, вăл 91,9 процентпа танлашрĕ, иртнĕ çулта ку кăтарту 96,2 процент пулнă. Ют пурлăха хапсăннă тĕслĕхсене, обществăлла вырăнта йĕркене пăснине тата вăтам йывăр преступленисене уçса парасси япăхланчĕ. Пĕтĕмпе тăрă шыв çине кăларман 3 преступлени юлчĕ, иртнĕ çулта - 2. Шыравра отчетлă тапхăрта икĕ преступник пулчĕ, пĕрине шыраса тупман-ха. Хыпарсăр çухалнă 4 çын шыравра шутланчĕ, вĕсем ăçтине тупса палăртман-ха. Тăванĕсемпе çыхăну татнă икĕ çынран пĕрине тупрăмăр. Районти полици уйрăмĕнче тăрăшакансем малашне те хăйсем умĕнче тăракан тĕллевсене пурнăçлас, районта пурăнакансене хăрушсăрлăхпа тивĕçтерес, преступленисен шутне чакарас, оперативлă ĕçе вăйлатас тесе ĕçлĕç.
А.МИХОПАРКИН, районти полици уйрăмĕн начальникĕ.