Публикации » Социаллă кил-çурт çĕкленет

16 апреля 2014 г.

Юлашки вăхăтра районта социаллă кил-çурт тăвас енĕпе ĕçсем ăнăçлă пурнăçланаççĕ. 2012 çулта Хĕрлĕ Чутай салинчи Çĕнĕ урамра республикăри ятарлă программăпа килĕшỹллĕн тăлăх ачасем валли виçĕ хутлă, 15 хваттерлĕ çурт тума тытăннăччĕ. Халĕ вăл çуртра пурăнаççĕ те ĕнтĕ. Çавăн хыççăн районта тăлăх тата ашшĕ-амăш хỹттисĕр юлнисем валли çурт тăвасси кал-кал пулса пычĕ темелле - Хĕрлĕ Чутай салинчи Ленин урамĕнче пурĕ 10 хваттерлĕ икĕ çурт çĕкленчĕ. Хальхи вăхăтра вĕсенчен пĕринче шалта хăтлăх кĕртессипе ĕçсем пыраççĕ. Иртнĕ çул вĕçĕнче Ленин урамĕнчех тăлăх ачасем тата авариллĕ кил-çуртран куçакансем валли тата тепĕр нумай хваттерлĕ çурт никĕсне хывнăччĕ. Халĕ виçĕ хутлă хитре кирпĕч çурт катаранах курăнса ларать - унăн çи виттине те тунă, чỹречисемпе алăкĕсене те лартнă. Халĕ шалти ĕçсем пурнăçланаççĕ. Кунта "Батыревское МТС" ТЯО ĕçченĕсем вăй хураççĕ. Вĕсем 27 хваттерлĕ çурта кăçалхи сентябрь уйăхĕнче хута яма палăртаççĕ. Çапла вара авариллĕ виçĕ çуртри 10 çемьен тата тăхăр тăлăх ачан çулталăк вĕçнелле çĕнĕ хваттерсене куçма май пулĕ. Палăртмалла, ку çурта тума федераллă бюджетран 8 миллион тенкĕ уйăрнă, республика бюджетĕнчен - 14 миллион тенкĕ. Асăннă çуртпа юнашарах 22 хваттерлĕ çурт тума пуçланă. Кунта районта пурăнакансем пая кĕрсе хваттер туянма пултараççĕ.

А.КАРПОВА.