21 апреля 2014 г.
Иртнĕ эрнере районти агропромышленность комплексĕнче тăрăшакансем çурхи ака-суха ĕçĕсем пуçланас умĕн канашлăва пухăннă. Вĕсем чи малтанах выльăх-чĕрлĕх аталанăвĕн пĕрремĕш кварталĕнчи кăтартăвĕсене, çурхи уй-хир ĕçĕсене хатĕрленес ыйтăва тишкернĕ. Канашлу ĕçне район администрацийĕн пуçлăхĕ Александр Башкиров, "Агро-Инноваци" ЧР ХУП-ăн директорĕ Николай Васильев, "Россельхозцентр" ФПБУ филиалĕн районти начальникĕ Анатолий Краснов, "Россельхозбанк" УАО-н районти хушма офисĕн управляющийĕ Николай Огаринов, "Поддержка" страхлав компани представительствин начальникĕ Виталий Чишкин, Турă Хĕресне Çĕкленĕ Храмăн настоятелĕ Максим атте тата ял хуçалăх производство кооперативĕсен, хресченпе фермер хуçалăхĕсен, ял хуçалăх пайĕн специалисчĕсем хутшăннă. Малтанах райадминистрацин ял хуçалăх пайĕн начальникĕ Владимир Храмов ял хуçалăх предприятийĕсенчи 2014 çулхи виçĕ уйăхри выльăх-чĕрлĕх аталанăвне тишкернĕ. Апрелĕн 1-мĕшĕ тĕлне районти пур категориллĕ хуçалăхсенче чĕрĕ виçепе 577 тонна аш-какай, ял хуçалăх предприятийĕсенче 175 тонна аш туса илнĕ. Çакă иртнĕ çулхинчен 41 тонна ытларах. Пĕтĕмпе пур категориллĕ хуçалăхсенче 4560,4 тонна сĕт (190,1 процент), ял хуçалăх предприятийĕсенче 951,0 тонна (102,1 процент) сĕт суса илнĕ. Пур йышши хуçалăхсенче пĕтĕмпе 10922 мăйракаллă шултра выльăх (87,1 процент), вĕсенчен (5263 ĕне, 4144 сысна) ял хуçалăх производство кооперативĕсенче вара 2528 пуç мăйракаллă шултра выльăх, 943 ĕне (84,2 процент), 3049 пуç сысна (115,4 процент) шутланать. Выльăх шучĕпе "Коминтерн" хуçалăх малта, унта пĕтĕмпе 1486 пуç. Владимир Викторович çурхи ĕçсемпе çыхăннă ыйту çинче те чарăнса тăнă. Кăçал хуçалăхсен çурхи культурăсене 4145 гектар акма тивет, вăл шутра пĕрчĕллĕ тата пăрçа йышши культурăсем 3406 гектар йышăнĕç. Хуçалăхсем 1032 тонна вăрлăх хатĕрленĕ. 772 тонна вăрлăха тĕрĕсленĕ, вĕсенчен 660 тонна кондициллĕ (86 процент). Кĕрхи пĕрчĕллĕ культурăсене, нумай çул ỹсекен курăксене апатлантарма тата ял хуçалăх культурисене акнă чух ретсене хывма 515 тонна минераллă удобрени туянса хунă. Çавăн пекех ях хуçалăх предприятийĕсем çурхи уй-хир ĕçĕсем пынă вăхăтра техника валли 179 тонна дизель топливи туянма палăртнă. Хальлĕхе ăна 110 тонна илнĕ, кỹрсе килесси малалла пырать. "Россельхозцентр" ФПБУ филиалĕн районти начальникĕ Анатолий Краснов хăйĕн сăмахĕнче районти хуçалăхсенче вăрлăх хатĕрлес ĕç епле пулса пыни пирки каласа панă. Ку енĕпе "Коминтерн", "Нива" ЯХПК-сем, Н.И.Лисаев тата В.А.Никитин хресченпе фермер хуçалăхĕсем уйрăмах аван ĕçленине, вĕсенче мĕн пур вăрлăха кондицие çитернине палăртнă. Канашлăва хутшăнакансем пĕр-пĕрин ĕç опычĕпе паллашнă. "Коминтерн" ертỹçи Альбина Новикова хăйсен ĕçĕсемпе çитĕнĕвсем çинчен каласа панă. "Нива" хуçалăх ертỹçи Владимир Мурайкин ял тăрăхĕсен депутачĕсен Съездĕнче пулнă май пухăннисене çĕнĕ те интереслĕ информаципе паллаштарнă. Мероприяти вĕçĕнче Владимир Иванович республикăн тата районăн политика пурнăçĕнче активлă пулнăшăн Пĕтĕм Раççейри "Единая Россия" политика партийĕн Тав çырăвне тивĕçнĕ. "Россельхозцентр" ФПБУ филиалĕн районти начальникĕ Анатолий Краснов ял хуçалăх отраслĕнче нумай çул хушши тỹрĕ кăмăлпа ĕçленĕшĕн тата 60 çулхи юбилей ячĕпе район администрацийĕн Хисеп грамотине тивĕçлĕ пулнă. Канашлăва район администрацийĕн пуçлăхĕ Александр Башкиров пĕтĕмлетнĕ, вăл çурхи уй-хир ĕçĕсене яваплăха туйса тата агротехника вăхăтне пăхăнса пурнăçламаллине палăртнă.
А.ДМИТРИЕВА.