23 апреля 2014 г.
Хальхи вăхăтра район пурнăçĕ ял тăрăхĕсен пу&¸лăхĕсемсĕр, район Пухăвĕн тата ял тăрăхĕсен депутачĕсемсĕр, муниципалитет ĕçченĕсемсĕр _ халăх влаçĕсĕр _ пулма та пултараймасть пулĕ. Хĕрлĕчутайсен пурнăç шайне лайăхлатассишĕн тăрăшакан активлă çынсем хамăр хушăрах пуррине хăнăхнă эпир. Шăпах çакăн пек çынсен уявĕ _ Вырăнти хăй тытăмлăх ĕçченĕсен кунĕ _ пулчĕ апрелĕн 21-мĕшĕнче. Палăртмалла, апрелĕн 18-мĕшĕнче Шупашкарта Чăваш патшалăх академи театрĕнче республика шайĕнчи уяв иртнĕ _ районсемпе хуласенчи вырăнти хăй тытăмлăх органĕсен ĕçченĕсем пĕрле пухăннă. Вĕсене республика Пуçлăхĕ Михаил Игнатьев саламланă, вырăнти хăй тытăмлăх аталанăвне пысăк тỹпе хывнисене, муниципалитет службинче тỹрĕ кăмăлпа тата тухăçлă ĕçлекенсене наградăсем парса чысланă, çав шутра _ Пантьăк ял тăрăхĕн ертсе пыракан эксперт специалистне Валентина Жижайкинана. Республика парламенчĕн Спикерĕ Юрий Попов республикăн чи лайăх муниципаллă ĕçченĕсене Патшалăх Канашĕн Хисеп грамотисене панă. Çак хисепе тивĕçнисен шутĕнче райадминистрацин культурăпа спорт тата архив ĕçĕн пайĕн тĕп эксперт специалисчĕ Алина Михуткина пур. Тунти кун вара, апрелĕн 21-мĕшĕнче, район администрацийĕн ларусем ирттермелли Пысăк залне пухăннисене Чăваш Республикин Тĕрĕслевпе шутлав палатин председателĕ Татьяна Минина, ЧР Патшалăх Канашĕн депутачĕсем Николай Маловпа Валерий Павлов, район пуçлăхĕ Александр Степанов, район администрацийĕн пуçлăхĕ Александр Башкиров саламларĕç. Йăлана кĕнĕ тăрăх уявра вырăнти хăй тытăмлăх ĕçченĕсене тĕрлĕ шайри наградăсене парса чысларĕç. Район администрацийĕн йĕркелỹпе тĕрĕслев тата кадр ĕçĕсен секторĕн ертсе пыракан эксперт специалисчĕ Татьяна Трофимова ЧР Патшалăх Канашĕн Тав Çырăвне тивĕçрĕ. ЧР Транспорт министерствин Хисеп грамотисене Хĕрлĕ Чутай, Атнар, Пантьăк ял тăрăхĕсен пуçлăхĕсем Леонид Аргандейкин, Александр Кузнецов, Виталий Музяков тивĕçрĕç. Чăваш Республикин муниципаллă пĕрлешỹсен Канашĕн Грамотине Атнар, Хусанушкăнь ял тăрăхĕсене, Тихăнушкăнь ял старостине Порфирий Волкова, Сорăм ял старостине Оксана Сорокинана, Мăн Этмен ял тăрăхĕн пуçлăхне Татьяна Артемьевана, Питĕркасси ял тăрăхĕн пуçлăхне Лилия Гаврилована, Атнар ял тăрăхĕн ертсе пыракан эксперт специалистне Надежда Илларионована, Тралькасси ял тăрăхĕн пуçлăхне Елена Лаврентьевана парса саламларĕç. "Единая Россия" партин регионти уйрăмĕн Тав çырăвне райадминистрацин опекăпа попечительство секторĕн заведующийĕ Алевтина Дадюкова, информаци ресурсĕсен секторĕн тĕп эксперт специалисчĕ Лариса Зайцева, право ĕçĕн секторĕн заведующийĕ Валентина Кондратьева, йĕркелỹпе тĕрĕслев тата кадр ĕçĕсен секторĕн тĕп эксперт специалисчĕ Лилия Пудова тивĕçрĕç. Çавăн пекех уявра ял тăрăхĕсен пуçлăхĕсене тата депутачĕсене, район администрацийĕн, ял тăрăхĕсен специалисчĕсене район пуçлăхĕн тата район администрацийĕн пуçлăхĕн Тав çырăвĕсемпе Хисеп грамотисене пачĕç. Уява Хĕрлĕ Чутайри вăтам шкулта тата Ачасен искусство шкулĕнче вĕренекенсем, ял тăрăхĕсенчи пултарулăх ушкăнĕсене хутшăнакансем, Чăваш Республикин тава тивĕçлĕ культура ĕçченĕ Александр Самсонов хăйсен юррисемпе илем кỹчĕç. А.КАРПОВА.
¸