23 апреля 2014 г.
-- "Эпир тĕрĕс ППЭ-шĕн". Çак девизпа иртĕç кăçалхи пĕрлехи экзаменсем. Вĕренỹ çулĕ вĕçленесси нумаях юлмарĕ, шкулпа сыв пуллашма хатĕрленекенсем тĕрĕслев пуçланиччен пĕлĕвне çирĕплетсе хăварма тăрăшаççĕ. Çав хушăрах вĕренекенсене те, ашшĕ-амăшне те ППЭ-не йĕркелесе ирттерес енĕпе кăсăклантаракан япала та чылай. Çывхаракан экзаменсемпе çыхăннă ыйтусем çине район администрацийĕн пуçлăхĕн пĕрремĕш çумĕ _ вĕренỹ пайĕн начальникĕ Алексей Порфирьев хуравлама кăмăл турĕ.
- Алексей Юрьевич, кăçал патшалăхăн пĕрлехи экзаменне районти миçе шкул ачи тытĕ? Тĕрĕслеве пĕтĕмпех хатĕр-и?
- Кăçал асăннă тĕрĕслев витĕр районти 107 вĕренекен тухĕ. Чăваш Республикин Вĕренỹ министерствин ятарлă хушăвĕпе килĕшỹллĕн районта патшалăх экзаменне ирттермелли пĕр пункт çирĕплетнĕ _ вăл Хĕрлĕ Чутайри вăтам шкул. Ку шкулта аудиторисемпе кăритурсене экзамен ирттерме хатĕрлесе çитернĕ, экзамен пуçланиччен пĕр кун малтан вĕсене пичетлесе хурĕç. Районти шкулсенче 11-мĕш класра вĕренекенсене патшалăх экзаменĕсене хальхи требованисем ыйтнă пек хатĕрлеççĕ.
- 11-мĕш класра вĕренекенсем ытларах мĕнле предметсемпе пĕлĕвĕсене тĕрĕслесшĕн?
- Пирĕн выпускниксем, ыттисем пекех, кăçалхи мартăн 1-мĕшĕччен мĕнле предметсемпе экзаменсем тытассине палăртса хучĕç. Вырăс чĕлхипе тата математикăпа экзамен пурин те тытмалла. Районти 73 выпускник обществознанипе пĕлĕвĕсене тĕрĕслесшĕн, 34-шĕ _ биологипе, 23-шĕ _ физикăпа, 23-шĕ _ историпе, 12-шĕ _ химипе, 3-шĕ _ информатикăпа, 3-шĕ _ литературăпа, 2-шĕ _ акăлчан чĕлхипе, пĕри _ географипе.
- Районти выпускниксем экзаменсене ăçта тытĕç?
- Пурин те тытмалли предметсене _ вырăс чĕлхипе математикăна _ Хĕрлĕ Чутайри вăтам шкулта тытĕç. Суйласа илнĕ предметсемпе _ Етĕрнери, Çĕмĕрлери, Шупашкарти вăтам шкулсенче. _ ППЭ-н пĕрлехи расписанийĕпе паллаштарсамăр. _ Патшалăх экзаменĕсен тĕп тапхăрĕ май уйăхĕн 26-мĕшĕнчен пуçласа июнь уйăхĕн 11-мĕшĕччен пырĕ: - майăн 26-мĕшĕ (тунти кун) _ географи, литература; - майăн 29-мĕшĕ (кĕçнерни кун) _ вырăс чĕлхи; - июнĕн 2-мĕшĕ (тунти кун) - ют чĕлхесем, физика; - июнĕн 5-мĕшĕ (кĕçнерни кун) _ математика; - июнĕн 9-мĕшĕ (тунти кун) _ информатикăпа ИКТ, биологи, истори; - июнĕн 11-мĕшĕ (юн кун) _ обществознани, хими. Пур предметпа та экзаменсем 10 сехетре пуçланаççĕ. Математикăпа, физикăпа, литературăпа, информатикăпа экзамен 3 сехет те 55 минут пырĕ, вырăс чĕлхипе, историпе, обществознанипе _ 3 сехет те 30 минут, биологипе, географипе, химипе, ют чĕлхесемпе _ 3 сехет.
- Экзамен тĕрĕслевĕнчи çĕнĕлĕхсем пирки мĕн калама пултаратăр?
- Пĕтĕмĕшле илсен экзамен йĕркинче улшăнусем çук, тĕрĕслев енчен вара çĕнĕлĕх кĕртĕç. Экзамен йĕркине пăсакансене çийĕнчех тупса палăртас тĕллевпе пунктсенче пĕлтĕрхи пекех видеосăнав хатĕрĕсем пулĕç. Кăçалхи çирĕпрех мерăсем шутне вара экзамена кĕрекенсене ятарлă хатĕрпе тĕрĕслессине, çумра тимĕр япала пуррипе çуккине палăртассине кĕртмелле. Экзамен паракана класа телефонсăр кĕртессипе тата терроризмран хỹтĕленессипе çыхăннă çакă.
- Патшалăхăн пĕрлехи экзаменне тытма хатĕрленекенсене Эсир мĕн суннă пулăттăр?
- Тĕрĕслеве çине тăрсах хатĕрленсе экзаменсене тỹрĕ кăмăлпа тытма сĕнетĕп. Темле пулсан та патшалăх экзаменĕ ан хăраттăр, тăрăшма хавхалантартăр.
- Тавтапуç калаçушăн.
А.КАРПОВА калаçнă.