23 апреля 2014 г.
Кашни çулах районти полици уйрăмĕн çул-йĕр инспекцийĕн сотрудникĕсем вĕренỹ пайĕпе тата Раççей ДОСААФ-ĕн районти уйрăмĕпе пĕрле çамрăк инспекторсен конкурсне йĕркелеççĕ. Кăçал та, апрелĕн 18-мĕшĕнче, "Хăрушлăхсăр кустăрма" республика конкурсĕн районти тапхăрĕ Мăн Этменти пĕтĕмĕшле пĕлỹ паракан вăтам шкулта иртрĕ. Мăнэтменсен шкул территорийĕнче асфальт сарса хытарнă тикĕс лаптăк çинче велосипедистсем валли ятарласа паллă тунă йĕрсем пур. Çавăнпах çамрăк инспекторсем çулсеренех кунта пухăнаççĕ, шкул дирекцийĕ конкурс йĕркелеме акт залне уçса, классем уйăрса парать. Палăртнă вăхăт тĕлне ăмăртăва Питĕркасси, Мăн Этмен, Мишеркасси, Шулю, Çĕн Атикасси, Атнар, Хĕрлĕ Чутай, Хусанушкăнь, Штанаш, Тури Çĕрпỹкасси шкулĕсен командисем килсе çитрĕç. 4-5 классенче пĕлỹ илекен хĕр ачасемпе арçын ачасен хăйсен вăйне тĕрлĕ конкурссенче кăтартма тиврĕ. Пĕр вăхăтрах пĕрисем велосипедпа тĕрлĕ фигурăсем туса кăтартрĕç, чăрмавсем витĕр тухрĕç. Теприсем акт залĕн сцени çинче çул-йĕр правилисен тематикипе хăйсен юрлас, ташлас, сăвă калас пултарулăхĕпе паллаштарчĕç. Виççĕмĕшĕсем çул-йĕр правилисемпе, пирвайхи медицина пулăшăвĕпе çыхăннă теста хуравларĕç. Командăсен кĕрешĕвĕнче мăнэтменсен команди виççĕмĕш, çĕнатикассисем иккĕмĕш тухрĕç, Хĕрлĕ Чутайри вăтам шкул команди пĕрремĕш пулчĕ. 4 "А" класри Дмитрий Ермолаев, Артем Чеченешкин, Василина Трегубова тата Ирина Ярабаева конкурссенче питĕ пултаруллă пулчĕç. "Çул-йĕр правилисене лайăх пĕлекенсем" уйрăм тупăшура Ирина виççĕмĕш тухрĕ, Дима _ пĕрремĕш. Пĕрремĕш пулăшу никĕсĕсене пĕлессипе команда ăмăртăвĕнче хĕрлĕчутайсем виççĕмĕш пулчĕç, "Çул-йĕр правилисене лайăх пĕлекенсем" тупăшура команда пĕрремĕш вырăн йышăнчĕ. Май уйăхĕнче Хĕрлĕ Чутай команди район чысне республикăра хỹтĕлĕ. Çамрăк инспекторсене ЧР ГИБДД Управленийĕн штаб инспекторĕ Сергей Шэрне, Çĕмĕрле тата Хĕрлĕ Чутай районĕсен çул-йĕр инспекцийĕн начальникĕ Владимир Галкин, Александр Майоров тата Александр Герасимов инспекторсем, Раççей ДОСААФ-ĕн районти уйрăмĕн председателĕ Владимир Егоров уйрăм тупăшусенче палăрнă çамрăк инспекторсене, командăсене пурне те конкурса хутшăннăшăн тав турĕç, Дипломсем, парнесем парса хавхалантарчĕç.
А.ЗАМУТКИНА.