Публикации » Çуллахи спорт тапхăрĕ уçăлчĕ

28 апреля 2014 г.

Апрелĕн 23-мĕшĕнче Хĕрлĕ Чутай салин Тĕп стадионĕнче çуллахи спорт тапхăрĕ уçăлчĕ. Мероприятие уçма райадминистрацин культурăпа спорт тата архив ĕçĕн пай начальникне Александр Самсонова шанчĕç. Стартра ăнăçу тата финишра çĕнтерỹ сунчĕ вăл спортсменсене. Ăмăртусен тĕп судйи Алексей Никитин та кроса хутшăнакансене уяв ячĕпе саламларĕ, спортра çитĕнỹсем тума иксĕлми вăй-хал сунчĕ. Çак кун районти шкулсен, учрежденисен, предприятисен, ял тăрăхĕсен спортсменĕсем старта тухрĕç. Ăмăртусем тĕрлĕ ỹсĕмри ушкăнсенче иртрĕç. Мала тухассишĕн пурте хастар тупăшрĕç. Массăллă чупура 13 çулхи хĕрсемпе çамрăкраххисем хушшинче 500 метрлă дистанцире Мăн Этмен шкулĕнче вĕренекен Наталья Романована çитекенни пулмарĕ.Çак ỹсĕмри арçын ачасем хушшинче Атнар шкулĕнче вĕренекен Михаил Князев ыттисене хыçала хăварма пултарчĕ. 14-15 çулхи хĕрсем хушшинче 1000 метрлă дистанцире финиша пĕрремĕш Çĕн Атикасси шкулĕнче вĕренекен Мария Тимешкова тухрĕ. Çак ỹсĕмри яшсем хушшинче Хĕрлĕ Чутай шкулĕнче ăс пухакан Владимир Магаськин пĕрремĕш пулчĕ. 16-17 çулхи яшсемпе хĕрсем хушшинче Анжелика Патьяновапа (Хĕрлĕ Чутай шкулĕ) Андрей Перепелкин (Атнар шкулĕ) çĕнтерỹçĕсен ятне тивĕçрĕç. 19-29 çулхисем хушшинче Надежда Мессер тата Андрей Сидоров (райпо) мала тухрĕç. 30-39 çулхи спортсменсем хушшинче финиша пĕрремĕш Евгений Захаров (район больници) тата Ирина Константинова (райпо) çитрĕç. 40-49 çулхи хĕрарăмсемпе арçынсем хушшинче Галина Мидейкинапа (Хĕрлĕ Чутай шкулĕ) Сергей Кчетков (Хĕрлĕ Чутай ял тăрăхĕ) ыттисене хыçала хăварма пултарчĕç. 50-59 çулхи спортсменсем хушшинче пьедесталăн çỹлти картлашки çине Римма Вазяковапа Виталий Музяков (Пантьăк ял тăрăхĕ) тăчĕç. 60 çулхисен тата аслăрах ỹсĕмрисен ушкăнĕнче финиша пуринчен малтан Людмила Михуткинапа ("Хастар" спорткомплекс) Валентин Харитонов çитрĕç. Массăллă çăмăл атлетика чупăвĕн пĕтĕмлетĕвĕпе çĕнтерỹçĕсенчен йĕркеленĕ команда ĕнер Канашра иртекен республикăри çуркуннехи кроса хутшăннă. А.АЛЕКСЕЕВА.