28 апреля 2014 г.
Хальхи вăхăтра республикăра ĕç сыхлавĕн уйăхлăхĕ пырать, ăна апрелĕн 28-мĕшĕнче паллă тăвакан Пĕтĕм тĕнчери ĕç сыхлавĕн кунне халалланă. Уйăхлăх тĕллевĕ _ ĕçпе тивĕçтерекенсене тата производствăна хутшăнакансене ĕç сыхлавĕ, инкек-синкек тата професси чирĕсен профилактикипе çыхăннă ыйтусем тĕлĕшпе тимлĕрех пулмалли çинчен аса илтересси, хамăр тăрăхри ятлă-сумлă предприятисен опычĕпе паллаштарасси. Унпа пĕрлех ĕçченсене хăрушсăрлăх правилисене пăхăнмалли çинчен вĕрентесси тĕп вырăн йышăнать. ЧР Сывлăх сыхлавĕпе социаллă аталану министерстви пĕлтернĕ тăрăх, республикăра 2013 çулта производствăра 14 çын вилнĕ, 209-шĕ суранланнă. Ытларах тирпейлекен производствăра тата строительствăра, транспортпа çыхăнура тăрăшакансем аманаççĕ. Вилекенсем те ытларах асăннă ĕçсенче тата вăрман хуçалăхĕнче тимленĕ. Сиенлĕ тата хăрушă условисенче вăй хуракансен хисепĕ те ỹснĕ. Республикăра ĕçлекенсен пĕтĕм йышĕнчен вĕсем 39,9 процент е 39 пин ытла çын шутланаççĕ. Çавсенчен 12,6 пинĕ _ хĕрарăмсем. Тата 30,7 пинĕшĕ гигиена нормативĕсене тивĕçтермен вырăнта вăй хурать. Ĕç условийĕсене лайăхлатассине, çынсен сывлăхне упрассине республика ертỹлĕхĕ пысăк тимлĕх уйăрать, ятарлă мерăсем йышăнать. Вĕсем ăнăçлă пурнăçланаççĕ. Сăмахран, "Чăваш Республикинче вăй хуракансен ĕç условийĕсене тата сывлăхне лайăхлатасси" ятарлă çумпрограммăпа 2012-2020 çулсенче пĕр миллиард тенкĕ уйăраççĕ. А.ТИМОФЕЕВА.