Публикации » Шыв - пурнăç валли

28 апреля 2014 г.

Республикăра "Парксен маршĕ" экологи акцийĕ апрелĕн 19-мĕшĕнче "Шыв пурнăç валли _ чĕрĕ çут çанталăкра" девизпа иртнĕ. Шывсăр пурнăç çук _ çакна пурте пĕлетпĕр. Анчах та чылай чухне таса шыв çăл куçĕсене _ пĕвесемпе кỹлĕсене _ хамăрах варалатпăр. Çавăнпа та ку хутĕнче "Парксен маршне" заповедниксемпе наци паркĕсене хỹтĕлессине халалланă. Шăпах асăннă вырăнсенче экологишĕн тăрăшаççĕ, çут çанталăкри шыв пуххисене упраççĕ. "Парксен маршĕ" акцие Хĕрлĕ Чутайри вăтам шкулăн "Тантăш" тимур команди те (ертỹçи Галина Артемьева) хутшăннă. "Çут çанталăка упра" ятпа иртнĕ пĕрремĕш тапхăрта ачасем аншлаг хатĕрленĕ. "Шывсăр пурăнаймастпăр" тесе çырнă плаката вĕсем Хĕрлĕ Чутайри чиркỹ çумĕнчи пĕве патне вырнаçтарнă. Кунта çынсем уçăлса çỹреме юратаççĕ. Тимуровецсем хăйсен плакачĕпе пурне те пĕвене таса тытма чĕнсе калаççĕ. Пĕрремĕш тапхăр пĕтĕмлетĕвĕпе хĕрлĕчутайсем 3-мĕш вырăн йышăннă. Иккĕмĕш тапхăрĕ Шупашкарти Андриян Николаев ячĕллĕ ача-пăча паркĕнче иртнĕ. Унта ачасем шывăн экотытăмĕ çинчен кăсăклине чылай пĕлнĕ. Эстафетăсемпе квестсем вăхăтĕнче тимуровецсем уйрăмах хураллакан çут çанталăк территорийĕсенчи флорăпа фаунăна сыхлани таса шыва упрама пулăшни çинчен информаци илнĕ. Акцие хутшăнакансем "Çĕнĕлле ту" станцире те кăсăклине нумай пĕлнĕ. Тĕслĕхрен, кивелсе çитнĕ батарейкăсене йăлари ытти каяшсемпе пĕрле çỹп-çап витрине пăрахма юрамасть _ вĕсене уйрăммăн пухмалла. Асăннă станцири вăйăсене хутшăннăшăн Хĕрлĕ Чутай шкулĕн тимуровецĕсем Диплома тивĕçнĕ.

А.КАРПОВА.