30 апреля 2014 г.
Районти ют чĕлхене вĕрентекенсем Раççейри Британи çулне халалласа темиçе мероприяти те ирттерчĕç. Апрелĕн 23-мĕшĕнче районти кашни шкул вĕренекенĕ пĕр-пĕр уяв пирки презентаципе паллаштарчĕ е кĕске спектакль кăтартса, е сăвă каласа, е юрă юрласа Британири тата Америкăри уявсем пирки каласа пачĕç. Кăçал, акă, Вильям Шекспир çуралнăранпа 450 çул çитрĕ. Хĕрлĕ Чутайри Татьяна Романова ун пирки сăвă пăхмасăр каласа пачĕ. Чутайсемех Роберт Бернс поэтпа çыхăннă уява сăнласа пачĕç: шотланди ташшине кăтартрĕç, Бернс сăввисене вырăсла тата акăлчанла янратрĕç. Француз чĕлхине вĕренекенсем Кристина Яхатина, Олеся Петрова тата Мария Филиппова Францири уявсемпе паллаштарчĕç. Кристина Лапаева Çветтуй Валентин уявĕ пирки каласа пачĕ. Питĕркасси шкулĕнче вĕренекен Павел Михуткин пурте юратакан Раштав уявĕн Британири пулăмĕсем çинче чарăнса тăчĕ. Хусанушкăнь шкулĕнче вĕренекен Марина Токшикова Пĕтĕм тĕнчери Çĕр уявĕ пирки сăмах хускатрĕ. Çĕр планетăна упрасси пирки тĕплĕн чарăнса тăчĕ. Штанашри Кристина Иванова Анне уявĕ, Надежда Устинова Хэллоуин пирки каласа пачĕç. Хĕр ачасем акăлчан чĕлхине юратса вĕренеççĕ, уявсем пирки илемлĕ презентацисем хатĕрленĕ, текстсене пăхмасăр каласа кăтартрĕç. Пăхăнманлăх кунне Британире те, АПШ-ра та уявлаççĕ. Çĕн Атикасси шкулĕнче вĕренекен Лариса Ванюшкина çав уяв кунĕпе тĕплĕн паллаштарчĕ. Мăн Этменти вăтам шкулта ăс пухакансем Çуралнă куна, атнарсем Гай Фокс кунне, туриçĕрпỹкассинчи Татьяна Максимовапа Ирина Романова Тав кунне сăнарларĕç. Иртнĕ эрнере Мăн кун эрни пулнă май Хĕрлĕ Чутай шкулĕнче 11 класра вĕренекен Татьяна Борисова телеертỹçĕ пек пулса пиллĕкмĕш класра вĕренекенсенчен интервью илчĕ. Мероприяти çỹллĕ шайра, интереслĕ иртрĕ.
Г.ЗОТОВА.