Публикации » "ТАШĂ КАЛЕЙДОСКОПĔ"

08 мая 2014 г.

Шăпах çак ятпа иртрĕ апрелĕн 30-мĕшĕнче районти Культурăпа кану центрĕнче ташă каçĕ. Ăна апрелĕн 29-мĕшĕнче тĕнчипе паллă тăвакан Ташă кунне халалланă. Ачасен ташă коллективĕсем хутшăннипе иртнĕ фестиваль ачалăх, хускану, юрă-кĕвĕ, илем, çепĕçлĕх, çыпăçулăх уявĕ пулчĕ. 30 ытла номер хушшинче чăваш, вырăс, испан, чикан ташшисем пулчĕç. Чылайăшĕ сцена çине хальхи кĕвĕсемпе лартнă ташăсемпе тухрĕ. "Колибри" ансамбль чылай ташăпа савăнтарчĕ. Çавăн пекех "Пилеш" тата "Хĕвел" ача сачĕсене çỹрекенсем, Хĕрлĕ Чутайри вăтам шкулта вĕренекенсем, "Хастар" ФСК-ан спорт аэробикин уйрăмĕн пикисем пултарулăхĕпе палăрчĕç. Андриан Тихонов Майкл Джексона ăста сăнласа пачĕ. Ачасене сцена çине тухма пулăшнă педагогсене те ятран асăнас килет: Наталья Храмова, Татьяна Сергеева, Надежда Хохлова, Надежда Гусельщикова, Зинаида Федорова, Алена Сарина, Татьяна Захарова, Надежда Галичанова, Валентина Вазикова, Светлана Сякаева. Çĕкленỹллĕ кăмăлпа, хавхаланса ташлакан ачасем куракансене савăнăçлă уяв каçĕ парнелерĕç.

А.КАРПОВА.