08 мая 2014 г.
Çапла каларĕ майăн 5-мĕшĕнче района килсе çитнĕ ЧР культура министрĕн çумĕ Татьяна Казакова хĕрлĕчутайсен клубсемпе çыхăннă ĕç-хĕлне тишкернĕ май. Муниципалитетсенчи культура учрежденийĕсене методика пулăшăвĕпе тивĕçтермешкĕн Культура министерствин специалисчĕсем çулсеренех ятарлă графикпа килĕшỹллĕн районсене тухса çỹреççĕ. Тунти кун Татьяна Казакова ертсе пыракан ĕç ушкăнĕ районти культура çурчĕсен ĕç-хĕлне тишкернĕ май ял тăрăхĕсен пуçлăхĕсемпе, клубсен, библиотекăсен, архив, централизациленĕ бухгалтери ĕçченĕсемпе тĕл пулчĕ. Сăмах кăçал Раççейре иртекен Культура çулталăкне халалласа пурнăçламалли мероприятисем, культура ĕçченĕсен шалăвĕ пирки пычĕ. Районти культура ĕçченĕсем халăха паракан пулăшусем çинче Татьяна Казакова уйрăммăн чарăнса тăчĕ. Кунта çакна каласа хăвармалла: юлашки вăхăтра районта иртекен тĕрлĕ культура мероприятийĕсен шайĕ палăрмаллах ỹссе пыни куç кĕрет. Анчах та ялсенчи культура учрежденийĕсенче туса ирттерекен ĕçсем иккĕлентереççĕ. Час-часах ялти клубсене каçсерен уçманни, халăха нимĕнпе те кăсăклантарманни пирки илтме пулать. Редакцине те çакăн пирки çырусем ахальтен килмеççĕ. Тĕслĕхрен, нумаях пулмасть эпир пĕр ял тăрăхĕнчен çакăн пек çыру илтĕмĕр: "Пирĕн ял тăрăхĕнче пĕр клуб та йĕркеллĕ ĕçлемест. Анчах та хуçисем ĕçленĕ пек укçа илсе лараççĕ. Пĕртен-пĕр йĕркеллĕ клубĕ те яланах хупă. Кăнтăрла кăшт уçса илеççĕ те _ ĕçĕ те пĕтнĕ. Клубсем яланах халăх валли уçă пулнă _ кăнтăрла та, каçхине те. Халĕ вара каçхи вăхăтра çамрăксем барсенче, çĕрĕпех ĕçлекен лавккасенче кĕпĕрленсе лараççĕ, эрех-сăра ĕçеççĕ. Урăх ăçта каймалла вĕсен, клуб хупă пулсан? Нивушлĕ çамрăксене, халăха клуба явăçтарма май çук? Пирĕн шутпа, клубра каçсерен шашка, шахмат, теннис, дартс выляма, интереслĕ каçсем йĕркелеме пулать. Мĕншĕн клубпа туллин усă курмаççĕ?.." Шăпах çакăн пирки сăмах пычĕ те тĕл пулура. Татьяна Казакова тата министерство специалисчĕсем районти клубсенче тĕрлĕ пĕрлешỹсем миçе пулнине, унта çỹрекен çынсем мĕнпе кăсăкланнине тишкернĕ май культура ĕçченĕсен хăйсемшĕн мар, çынсемшĕн тимлемеллине палăртрĕç. "Культура ĕçченĕ район шайĕнче иртекен мероприятисене хутшăнни ялти клубра мероприяти иртнине пĕлтермест. Ĕç тухăçлă пултăр тесен клубра лартнă пĕр концертпа ытти ялсене тухса çỹремелле, çав хушăрах клубра та кашни кунах мĕн те пулин ирттермелле. Клуба çын ытларах килтĕр, анчах та вĕсем ахаль ан ларччăр, кашни хăйне май кăсăклану туптăр", _ терĕ Татьяна Васильевна. Çавăн пекех культура министрĕн çумĕ клубсенче тỹлевлĕ мероприятисем ирттермеллине, çапла майпа куллен кирлĕ пулма пултаракан япаласене туянмалăх тупăш тумаллине палăртрĕ. Шалу пирки сăмах пуçарнă май Татьяна Казакова хальхи вăхăтра республикăри муниципалитетсенче культура ĕçченĕсен уйăхри вăтам ĕç укçи 12 пин ытла пулнине палăртрĕ. Библиотекăсен ĕç режимне улăштарас ыйтăва та пăхса тухма сĕнчĕ Татьяна Васильевна. Чăнах та, вулавăшсем ирхи 8 сехетрен пуçласа каçхи 5 сехетчен ĕçлени тухăçлах та мар пулĕ _ чылайăшĕ шăпах çак вăхăтра ĕçлет, библиотекăна кайма ăçтан вăхăт пултăр? Пухăннисемпе пĕл-терĕшлĕ чылай ыйтăва сỹтсе явнă хыççăн Культура министерствин ĕç ушкăнĕ район архивĕнче тата Серенкассинчи Культура çуртĕнче пулса курнă, вĕсен ĕç-хĕлĕпе паллашнă. А.КАРПОВА.