19 мая 2014 г.
Нумаях пулмасть редакцине Ачкасси ял тăрăхĕнче пурăнакансенчен çыру килнĕччĕ. Унта Ачкасси ял тăрăхĕнчи культура çурчĕсем, унта ĕçлекенсем хăйсен тивĕçĕсене йĕркеллĕ пурнăçламанни, каçхи вăхăтра клубсене уçманни, çамрăксем клуб хупă пирки барсенче, лавккасем умĕнче пухăнни пирки пĕлтернĕччĕ.
Чăваш Республикин культура, национальность тата архив ĕçĕсен министерстви Ачкасси ял тăрăхĕнче вырнаçнă Культура çурчĕн ĕçĕ-хĕлĕ çинчен "Пирĕн пурнăç" хаçата килнĕ çырăва пăхса тухса çапла хуравлать: "Хальхи саккунпа килĕшỹллĕн Ачкасси ял тăрăхĕнче вырнаçнă клубсем ял администрацине пăхăнса ĕçлеççĕ. Паянхи куна Ачкасси ял тăрăхĕнче Серенкассинчи муниципаллă культура бюджет учрежденийĕ (директорĕ Н.Я.Пономарев) тата ун çумĕнче Ачкасси клубĕ (методисчĕ Л.А.Зверева _ 0,5 ставка), Серенкассинчи вулавăш (библиотекарĕ З.П. Анисимова _ 0,5 ставка), Ачкассинчи вулавăш (библиотекарĕ Н.Г.Храмова _ 1 ставка) вырнаçнă. Çырăва вуланă хыççăн çакна палăртмалла. Чăн та, Серенкасси клубĕ апрель уйăхĕнче каçхи вăхăтра ĕçлемен. Ку вăл клуба юсав ĕçĕсем тума хупнă пирки пулнă. Палăртмалла, юсав ĕçĕсене культура ĕçченĕсен вăйĕпех туса ирттереççĕ. Халĕ те унта ĕçсем вĕçленмен-ха. Клуб директорĕ Николай Пономарев апрелĕн 14-мĕшĕнче учреждение вăхăтлăха хупма хушу кăларнă, анчах хушăвне щитсем çинче халăха курма вырнаçтарман, çитменнине тата юсав ĕçĕ пыни пирки "Ĕç вăхăчĕ" текен вывескăна çĕнетме клуб умĕнчи стена çинчен илсе хунă. Çакă иртен-çỹрекене клуб ĕçĕ-хĕлĕ, ĕç вăхăчĕ пирки тĕрĕс мар ăнланма май панă. Апла пулин те юсав ĕçĕсене пăхмасăр кунта репетицисем иртеççĕ. Вырăнти артистсем Çĕнтерỹ кунне уявлама тăрăшсах хатĕрленнĕ. Çав вăхăтра Ачкасси клубĕ каçхине яланах халăхшăн уçă. Клубсем хăйсен репертуарне улăштармаççĕ, вырăнти авторсен хайлавĕсене халăх умне кăлармаççĕ, концертсемпе-спектакльсем лартмаççĕ тени вара тĕрĕс мар. Юлашки виçĕ çулта, Николай Пономарев директорта ĕçлеме пуçланăранпа, ял тăрăхĕнче халăх пултарулăхĕн шайĕ самаях ỹсрĕ. Ял тăрăхĕнчи пултарулăх ушкăнĕсем районти мĕн пур мероприятисене хастар хутшăнаççĕ кăна мар тата тăтăшах çĕнтереççĕ. Район шайĕнче кашни çулах тĕрлĕ тематикăпа смотр-отчет иртет. Ку пĕр тĕслĕх кăна. Унсăр пуçне, февраль уйăхĕнче Тăван çĕр-шыва халалланă юрăсен, май уйăхĕнче "Ташша яра пар!" ташă, сентябрьпе октябрь уйăхĕсенче "Асамлă чаршав" театр, декабрь уйăхĕнче "Иксĕлми Чутай çăл куçĕсем" фольклор фестивалĕсем иртеççĕ. Тата районта, ял тăрăхĕнче "Хĕле ăсатни", "Çĕнтерỹỹ", "Акатуй", "Ял хуçалăх ĕçченĕсен кунĕ" пысăк уявсем, "Февралĕн 23-мĕшĕ", "Мартăн 8-мĕшĕ" уяв концерчĕсем тата ытти те иртет. Кăçалтан пуçласа майăн 24-мĕшĕнче "Славянсен çырулăхĕ тата культури" уявне çĕнĕлле ирттерме палăртнă. Паллă ĕнтĕ, кашни мероприятин хăйĕн юрри-ташши. Серенкасси клубĕ вырăнти авторсемпе тачă ĕçлеме тăрăшать. Николай Пономарев çырнă пьеса фестивале хутшăнса иккĕмĕш вырăн йышăнма пултарчĕ, пьеса авторĕ "Чи лайăх режиссер" ята тивĕçрĕ, Галина Ямброськина хайланă шỹтсене халăх чăтăмсăр кĕтет, Анатолий Ĕмĕт шăрçаланă сăвăсенчен вырăнти композиторсем юрăсем хываççĕ. Николай Пономарев тăрăшнипе Ачкасси ял тăрăхĕнче хор йĕркеленсе кайрĕ. Смотр-отчетăн пирвайхи пĕтĕмлетĕвĕсем хыççăн ăна "Чи лайăх хор" номинацие, Николай Яковлевича вара "Иван Охливанкин юрăçăн юррисене чи лайăх юрлакан" номинацие кĕртнĕ. Çакна та каласа хăвармалла, ял тăрăхĕн пуçлăхĕ Игорь Герасимов культура ĕçченĕсене яланах пулăшу пама тăрăшать. Сăмахран, пĕлтĕр ноябрь уйăхĕнче Элĕк тăрăхне спектакль кайса кăтартма пултарчĕç. Кăçал Етĕрне районĕнче иртнĕ "Янра, хут купăс" конкурсра иккĕмĕш вырăн йышăннă. Серенкасси клубĕнче, фойере, шашкăлла, шахматла тата сĕтел çи теннисле выляма майсем туса панă. Кайса вăхăта усăллă ирттерме ỹркенмелле мар кăна". Т.КАЗАКОВА, ЧР культура, национальность тата архив ĕçĕсен министрĕн çумĕ.