26 мая 2014 г.
Май уйăхĕн 16-мĕшĕнче Йĕпреç поселокĕнче тивĕçлĕ канăва тухнă çынсем хушшинче республикăри II-мĕш Спартакиадăн спорт ăмăртăвĕсем пулса иртнĕ. Тивĕçлĕ канăва тухнă пултаруллă спортсменсем теннисла, шахматла выляса, çăмăл атлетика, шывра ишес енĕпе, пăшалтан персе, спорт ташшипе тата нумай енлĕ эстафетăра ăмăртса хăйсен ăсталăхне кăтартнă. Республика шайĕнчи пысăк ăмăртусене пирĕн районти спортпа туслă пенсионерсем те хутшăннă. Уйрăмах командăри çăмăл атлетсем пысăк çитĕнỹ тунă. Вĕсем 26 команда хушшинче II-мĕш вырăна тухма пултарнă. Район чысне Туктамăш ялĕнче пурăнакан Раиса Никитинапа Елена Альгешкина, Чурпай ялĕнчи Илья Иванов тата Хусанушкăнчи Валентин Харитонов çăмăл атлетсем ăнăçлă хỹтĕленĕ, Кубокпа кĕмĕл медальсем çĕнсе илнĕ. "Хастар" физкультурăпа спорт комплексĕнче вăй хуракан Людмила Михуткина хĕрарăмсем хушшинче шывра ишес енĕпе II-мĕш вырăна тухса Чăваш Республикин Физкультурăпа спорт министерствин Дипломĕпе медальне илме тивĕç пулнă. Çавăн пекех Йĕпреç поселокĕнче иртнĕ ăмăртусенче Хĕрлĕ Чутай салинче пурăнакан Энелина Манейкина, Зоя Майорова, Венера Бутузова, Евгений Сергеев, Николай Уливанкин, Владимир Стекольщиков тата Хусанушкăнчи тулли мар вăтам шкулта ĕçлекен Светлана Яруткина командăна мала кăларассишĕн нумай тăрăшнă. Хĕрлĕчутайсем пухнă очкосен хисепĕпе 21 район хушшинче шупашкарсемпе сĕнтĕрвăррисене çеç маларах ирттерсе ярса хисеплĕ III-мĕш вырăна тухнă. Сăмах май, районăн аслă ăрури спортсменĕсем пĕлтĕрхи I-мĕш Спартакиадăра та республикăра III-мĕш вырăна тухнăччĕ. Районти пултаруллă спорт ветеранĕсен малашне те пысăк çитĕнỹсем тума вăй-хал çиттĕр.
Ю.ЕГОРОВ, Раççей пенсионерĕсен Союзĕн районти Канашĕн председателĕ.